Թայլանդի «Ալիանս Ֆրանսեզ»-ի նախաձեռնությամբ (Alliance Française) մարտի 23-ին տեղի է ունեցել հիշատակի երեկո՝ նվիրված հայ աշխարհահռչակ շանսոնյե Շառլ Ազնավուրին: Որպես պատվավոր հյուրեր՝ միջոցառմանը ներկա են եղել նաև Թայլանդի հայկական համայնքի ներկայացուցիչները:

Ինչպես հաղոդում է «Հայերն այսօր»-ը, երեկոյի ընթացքում «Ալիանս Ֆրանսեզ»-ի երիտասարդ աշխատակիցները երգել են Ազնավուրի հայտնի ստեղծագործությունները, զուգերգերը, ներկայացրել են  նրան՝ նաև որպես դերասան, բանաստեղծ, կոմպոզիտոր, խոսել մարդկային բարձր հատկանիշների մասին՝ բազմիցս շեշտելով նրա հայ լինելը և Հայրենիքի նկատմամբ ունեցած բացառիկ վերաբերմունքը:  Օտար հանդիսատեսը հնարավորություն է ունեցել ծանոթանալու նաև երգչի կյանքին և գործունեությանը:

Միջոցառման ավարտին բեմ են հրավիրվել հայկական համայնքի ներկայացուցիչները,  որոնք կրել են «Merci Charles Aznavour» շապիկներն ու գլխարկները: Նրանք երախտագիտության խոսք ասելով մեծ հային նվիրված միջոցառումը կազմակերպելու համար՝ «Ալիանս Ֆրանսեզ»-ի աշխատակիցներին շապիկներ ու գլխարկներ  նվիրեցին՝ ի նշան հայ-ֆրանսիական բարեկամության: