Ախալցխայի փողոցներից մեկը Ազնավուրի պատվին անվանափոխելու նպատակով դիմում է ներկայացվել քաղաքի շրջանային ժողովին

Նոյեմբերի 5-ին «Սամցխե-Ջավախքի մեդիա վերլուծական կենտրոն» հասարակական կազմակերպությունը դիմել է ք. Ախալցխայի շրջանային ժողովին՝ քաղաքի փողոցներից մեկը անվանակոչել աշխարհահռչակ շանսոնյե Շառլ Ազնավուրի անունով: Դիմումը mediaanalytic.org-ը ներկայացնում է ամբողջությամբ.
Պարոն Գելա,
Ինչպես հայտնի է, 2005 թվականին ք. Ախալցխայի սակրեբուլոն Շառլ Ազնավուրին շնորհեց պատվավոր քաղաքացու կոչում, իսկ 2012-ին նա մասնակցեց Ախալցխայի Ռաբաթ բերդի բացման արարողությանը, որի ընթացքում բացվեց նրա անվան աստղը:
2018 թվի հոկտեմբերի 1-ին ծագումով հայ ֆրանսիացի երգիչը հեռացավ կյանքից: Նա արմատներով Սամցխե-Ջավախքի Ախալցխա քաղաքից էր:
2018 թվականի հոկտեմբերի 31-ին Ախալքալաքի սակրեբուլոն, ի պատիվ Շառլ Ազնավուրի, փողոցներից մեկն անվանակոչեց նրա անունով:
Ողջունել կլիներ, որ ք. Ախալցխայի շրջանի սակրեբուլոն քննարկեր վերոնշյալ հարցը, և ի պատիվ Շառլ Ազնավուրի՝ ք. Ախալցխայի փողոցներից մեկը կանվանակոչի նրա անունով:
Կարծում ենք, որ դա կնպաստեր զբոսաշրջության զարգացմանը, ինչպես նաեւ Շառլ Ազնավուրի անվան հավերժացմանը: