Սեպտեմբերի 19-ին,  սփյուռքի նախարարության, Երևանի քաղաքապետարանի և «Սիրիահայերի հիմնախնդիրները համակարգող կենտրոն» ՀԿ նախաձեռնությամբ Երևանում բացվեց  սիրիահայերի ձեռքի աշխատանքների «Սիրիահայ մշակույթի շունչը Երևանում» ավանդական դարձած բարեգործական ցուցահանդես-տոնավաճառը՝  նվիրված ՀՀ անկախության տոնին:

Ցուցահանդեսի բացմանը ներկա էին սփյուռքի նախարար Մխիթար Հայրապետյանն ու Հայաստանում Սիրիայի Արաբական Հանրապետության գործերի ժամանակավոր հավատարմատար և հյուպատոս Բաշար Սաֆին:

Ցուցահանդեսի շրջանակներում ներկայացված են ոչ միայն համեղ եւ բազմապիսի ուտեստներ,  այլեւ ձեռագործ աշխատանքներ, բնական քարերից և արծաթից պատրաստված զարդեր:

Մխիթար Հայրապետյանը շրջեց բոլոր տաղավարներով, ծանոթացավ մասնակիցների հետ, լսեց նրանց հուզող հարցերը: «Այսօրինակ միջոցառումները պետք է շարունակական բնույթ կրեն, իսկ սփյուռքի նախարարությունն ամեն ինչ անում է, որպեսզի ստեղծի ընդհանուր մի հարթակ, որտեղ այս մարդիկ կարող են իրացնել իրենց ձեռքի աշխատանքները»:

Մասնակիցները հիմնականում նշում էին, որ չեն դժգոհում առևտրից, բայց չեն էլ կարող իրենց թույլ տալ վարձել առանձին խանութներ բացել: Այս հարցի հետ կապված  Մխիթար Հայրապետյանը նշեց, որ նախարարությունը  աշխատանքներ է տանում:

Հիշեցնենք, որ «Սիրիահայ մշակույթի շունչը Երևանում» բարեգործական ցուցահանդես-տոնավաճառը կգործի միայն սեպտեմբերի 19-ին, մինչև՝ ժամը՝ 19:00-ն: