«Կարծում եմ՝ վարչապետ Նիկոլ Փաշինյանը կձեռնարկի այնպիսի քայլեր, որոնց արդյունքը շատ արագ կզգա ժողովուրդը։ Այդ քայլերն առաջին հերթին վերաբերելու են մաքսային ոլորտին, զբոսաշրջությանը, սոցիալական խնդիրներին, ժողովրդին անմիջականորեն առնչվող հիմնահարցերին»,- նշել է Լիբանանի «Ազդակ» օրաթերթի գլխավոր խմբագիր, քաղաքական վերլուծաբան Շահան Գանտահարյանը՝ պատասխանելով «Նոյյան տապան»-ի՝ ի՞նչ ծրագրեր պետք է իրականացնի վարչապետ Նիկոլ Փաշինյանն անմիջական ժամանակահատվածում հարցին:

Լիբանանահայ քաղաքական գործիչը նշել է, որ բացի նշված հարցերից, վարչապետն ունի հրաշալի առիթ համաժողովրդական շարժումը վերածելու համազգային տոնախմբության և համայն հայության համախմբան, որի առանցքը Հայաստանի Հանրապետության հիմնադրության 100-ամյակն է. «Կարծում եմ՝ օպերատիվ կարգով պետք է վերականգնել 100-ամյակի միջոցառումները համակարգող պետական հանձնաժողովը, ընդ որում՝ ոչ միայն ներհայաստանյան հարթության վրա, այլև հայկական աշխարհում՝ նշելու մեր ժամանակակից պատմության ամենաէական և ամենաբախտորոշ իրադարձությունը»:

Զրույցի ընթացքում Շահան Գանտահարյանը նկատել է, որ նոր Հայաստանն արդիական հնչեղությամբ և մեծ խորհուրդներով կարող է կապվել Հայաստանի Հանրապետության հիմնադրության տարիների հետ՝ նկատի ունենալով այն օրերի խորհրդարանական համակարգը, ժողովրդավարական կարգերը և հատկապես՝ ողջ ժողովրդի համախմբվածությունը.

«Առաջնային հրատապությամբ վարչապետին առընթեր, գուցե և նրա նախագահությամբ, օպերատիվ պետք է սկսի աշխատել Հայաստանի Հանրապետության 100-ամյակի հանձնաժողովը, որը կարող է արդիական հնչեղություն տալ Հայաստանի Առաջին Հանրապետությունից նոր Հայաստանին փոխանցվող արժեհամակարգին»: