Դաշնակահարուհի, Երևանի Կոմիտասի անվան պետական կոնսերվատորիայի Ընդհանուր դաշնամուրի ամբիոնի դասախոս Սեդա Կոթիկյանը՝ հայ անվանի դերասան, բանաստեղծ, թարգմանիչ Արման Կոթիկյանի դուստրը, իր հայրիկին նվիրված «Չմոռանաք ի՛մ անունն էլ տալ…» վերնագրով հուշերի գիրք է հրատարակել: Նա այս հրատարակության մասին երկար տարիներ է մտածել, որը, սակայն, հաջողել է միայն 2017 թվականին կյանքի կոչել:

Սեդա Կոթիկյանի նպատակն է եղել գրքում ներկայացնել ոչ միայն դերասան, այլև՝ գրականագետ, բանաստեղծ թարգմանիչ Կոթիկյանին: Գիրքը կազմել է հայրիկից մնացած գրական ժառանգության, նյութերի, նրա ժամանակակիցների, խաղընկերների հուշերի ու նաև նրա երկրպագուների տպավորությունների հիման վրա: Ընդգրկված են նաև Արման Կոթիկյանի բանաստեղծություններից: Մի խոսքով, այս գիրքը հնարավորություն է տալիս ավելի լավ ճանաչելու թատրոնի և կինոյի մեծ վարպետին:

«Այս տարի լրանում է հայրիկիս մահվան 50-րդ տարելիցը, և այս գիրքը ձոնում եմ նրա անմահ հիշատակին: Գրքով հայրիկս վերադառնում է տուն, և նրա վերադարձը համարում եմ հուշարձան, որ կերտվեց  հայրիկիս ժամանակակիցների, նրա արվեստը սիրող նվիրյալների և մեր ընտանիքի լավ բարեկամների ձեռամբ»,-«Հայերն այսօր»-ի հետ զրույցում ասաց Սեդա Կոթիկյանը՝ հավելելով, որ այս նախաձեռնությամբ նաև որդիական պարտքն է կատարում իր սիրելի ծնողների հանդեպ, ովքեր իրենց  կյանքն ապրել են հայ ավանդական ընտանիքին բնորոշ մաքուր, առաքինի պահվածքով:

Խոսելով հայրիկից պահպանած հուշերի մասին՝ Սեդա Կոթիկյանը ժպիտով պատմեց, որ նա շատ ջերմ, միաժամանակ խստապահանջ անձնավորություն է եղել թե՛ իր անձի, թե՛ հարազատների նկատմամբ: Եվ այդ խստապահանջությունը զարմանալիորեն նրա կերտած բոլոր կերպարներում նկատվել է:

«Նա շատ ընկերասեր էր, մեր տուն հաճախ էին գալիս մեծանուն դերասաններ Հրաչյա Ներսիսյանը, Վահրամ Փափազյանը, գրողներից՝ Խաչիկ Դաշտենցը և ուրիշներ: Ահա այդպիսի մթնոլորտում եմ մեծացել, որն էլ հետագայում ճակատագրիս կերտման հարցում կարևոր նշանակություն ունեցավ»,-նշեց Սեդա Կոթիկյանը և ընդգծեց, որ մասնագիտական ընտրություն կատարել է մայրիկի՝ Օլգա Բաբասյանի հորդորով, ով նույնպես դաշնակահարուհի էր և Երևանի Կոմիստասի անվան պետական կոնսերվատորիայի պրոֆեսոր:

Սեդա Կոթիկյանը նաև շնորհակալություն հայտնեց բոլոր նրանց, մասնավորապես՝ գրքի հրատակիչներ Նունե Սամվելյանին և Վլադիմիր Հովհաննիսյանին, Հայաստանի Հանրային ռադիոյի տնօրեն Մարկ Գրիգորյանին, Եղիշե Չարենցի անվան գրականության և արվեստի թանգարանի աշխատակիցներին, ովքեր անշահախնդրորեն աջակցել են Արման Կոթիկյանի հուշերի գրքի լույս աշխարհ գալուն:

«Այս գրքով հայրիկս շարունակում է մնալ մեր տանը՝ ամենօրյա իր ներկայությամբ սփոփելով ինձ: Եվ ինչպես ինքն էր ասում. «Ամեն բան անցողիկ է, աղջի՛կս, մնայուն է միայն մարդու անունը, մնայուն է այն հիշատակը, որ սերում է գործերից»,- զրույցն ամփոփեց Սեդա Կոթիկյանը:

Արման Կոթիկյանը ծնվել է Տրապիզոնում։ Բեմ է բարձրացել 1918 թվականին։ 1920-1936թթ. ապրել է Փարիզում և Բրյուսելում: 1925 թվականին ավարտել է  Փարիզի համալսարանի իրավաբանական ֆակուլտետը, սովորել է նաև Սորբոնի համալսարանում:

Փարիզում խաղացել է հայկական թատերախմբերում։ 1936 թվականին ներգաղթել է Հայաստան և նույն թվականին աշխատանքի անցել Գաբրիել Սունդուկյանի անվան ազգային ակադեմիական թատրոնում։

Նրա լավագույն դերերից են՝ Լաերտ («Համլետ»), Յագո («Օթելլո»), Էլիզբարով («Պատվի համար»),  Ֆրանգուլյան («Ավերակների վրա»), Մանուկ աղա («Մեծապատիվ մուրացկաններ»), Հայրապետ («Ժայռ»):

Նկարահանվել է նաև մի շարք կինոֆիլմերում, այդ թվում «Տժվժիկ», «Նվագախմբի տղաները» ֆիլմերում։ Մահացել է Երևանում:

Գևորգ Չիչյան