Ավստրիայի հայ մանկական երգչախմբի սաները Հայր Մեր աղոթքի իրենց հրաշալի կատարումով դիմավորեցին հարգարժան պարոն Սարգսյանին, ով իր հերթին, երեխաներին անակնկալ մատուցեց և նվիրեց իր տիկնոջ’ հեքիաթագիր Նունե Սարգսյանի հեքիաթային գրքերից, որոնք շատ մեծ հիացմունք առաջացրեցին երեխաների մոտ.

Հայ Առաքելական եկեղեցու Կենտրոնական Եվրոպայի և Սկանդինավիայի Հայրապետական Պատվիրակ՝ Տ. Տիրան Վարդապետ Պետրոսյանը ներկայացնելով Արմեն Սարգսյանին նշեց, որ վերջինիս թեկնածության առաջադրումը պետության համար այդ կարևորագույն պաշտոնում ոգևորող է Ավստրիայի Հայ Համայնքի համար, քանի որ լավ ծանոթ լինելով Արմեն Սարգսյանի գործունեությանը թե Հայաստանում և թե Սփյուռքում, ակնկալում են լավ քաղաքական մշակույթի ձևավորում և զարգացման նոր իրողություն Հայաստանի համար:

Արմեն Սարգսյանը լսեց Ավստրիայի հայ համայնքի ակնկալիքներն ու մոտեցումներն ինչպես իր առաջադրման, այնպես էլ հայաստանյան ու համահայկական խնդիրների վերաբերյալ, ապա ներկայացնել իր տեսլականը:

Ավստրիայի հայ համայնքի ներկայացուցիչները, ներկայացնելով իրենց մոտեցումները համահայկական հիմնախնդիրների վերաբերյալ, խոսում էին Հայաստանի և Սփյուռքի կառույցներն արդյունավետ և ի նպաստ համահայական խնդիրների լուծման գործածելու անհրաժեշտությունից:

Արմեն Սարգսյանը ներկայացրեց բարձրացված հարցերի վերաբերյալ իր մոտեցումներն ու տեսլականը: Հանդիպումը անցավ բաց մթնոլորտում և շատ օգտակար էր: Խնդիրների քննարկման շրջանակը շատ մեծ էր՝ սկսած տնտեսության խնդիրներից, Արցախից, Գյումրիից, կրթությունից և այլն: Հայտնում ենք մեր խորին շնորհակալությունը հարգարժան պարոն Արմեն Սարգսյանին, ինչպես նաև Ավստրիայի հայ համայնքի բոլոր ներկայացուցիչներին հանդիպմանը իրենց ակտիվ մասնակցության և հետաքրքրության համար: