Հունվարի 12-ին Ֆրանսիայի Վալանս քաղաքի «Արմենիա» միությունը  Բուրգ-լե-Վալանսի «Jean Moulin» սրահում կազմակերպել էր «Cuisine d’Arménie» («Հայաստանի խոհանոցը») գրքի շնորհանդեսը՝ մասնակցությամբ գրքի հեղինակներ քույր և եղբայր Ռիշար և Կորին Զարզավաջյանների:

Ինչպես «Հայերն այսօր»-ին հայտնում են «Արմենիա» միությունից, «Cuisine d’Arménie» («Հայաստանի խոհանոցը») գիրքը մեծ աղմուկ է հանել Ֆրանսիայում, ներկայացվել Ֆրանսիայի հեռուստատեսությամբ, ռադիոյով և թերթերով:

Ռիչարդ Զարզավաջյանը France 2 հեռուստաընկերության լրագրող է, իսկ Կորին Զարզավաջյանը, որը վերջերս Հայաստան էր այցելել, դերասանուհի է:

Գիրքը պարունակում է հայկական շուրջ 100 ճաշատեսակ՝ լուսանկարներով և բաղադրատոմսերով: Այն մեծ համբավ է վայելում Ֆրանսիայում և արդեն վաճառվել է գրքի մի քանի հազար օրինակ:

Երեկոյին ներկա էին 80-ից ավելի մարդիկ, որոնց թվում էին Վալանսի հայկական միությունների ներկայացուցիչներ: Միջոցառմանը ներկա էին նաև Վալանսի և Բուրգ-լե-Վալանսի քաղաքապետարանների անդամներ:

«Արմենիա» միության նախագահ, լրագրող-ծաղրանկարիչ Գրիգոր Ամիրզայանն իր ելույթում շնորհակալություն հայտնեց հյուրերին՝ գրական երեկոյին ներկա լինելու համար:

Այնուհետև Ռիշար և Կորին Զարզավաջյանները ներկայացրեցին գիրքը, պատասխանեցին ներկաների հարցերին և մակագրեցին գրքերը:

Ավարտին տեղի ունեցավ փոքրիկ հյուրասիրություն: Գրիգոր Ամիրզայանը ներկաներին հրավիրեց ճաշակելու հայկական կերակրատեսակներ և գինի:

Հաջորդ օրը՝ հունվարի 13-ին, «Cuisine d’Arménie» («Հայաստանի խոհանոցը») գրքի շնորհանդեսը կայացավ Վիեն քաղաքի «Lucioles» գրադարանում և քաղաքի կենտրոնում գտնվող հայկական «Les Frangins» ռեստորանում: Նույն օրը գիրքը ներկայացվեց Լիոնի «Bahadourian»  հայկական հաստատությունում, որը գտնվում է «Halles de Lyon» կենտրոնում: