Հարգելի՛ հայրենակիցներ,

Ցանկանում ենք ՀՀ սփյուռքի նախարարության անունից խորին շնորհակալություն հայտնել խմբին և դրա նախաձեռնողներին՝ ի դեմս տիկին Նարինե Դավթյանի, Սիրիայի պատերազմի հետևանքով Հայաստան տեղափոխված մի խումբ սիրիահայ ընտանիքների խնդիրները ձեր ուշադրության կենտրոնում պահելու, վերջիններիս կողքին մշտապես լինելու և օրեր առաջ սիրիահայ Սարգսյան ընտանիքին բնակարանով ապահովելու համար:

Նախարարությունը ողջունում և բարձր է գնահատում այն փաստը, որ խմբի նախաձեռնությանը միացել են ոչ միայն բարերարներ, այլև սրտացավ և հայրենասեր մարդիկ՝ աշխարհի տարբեր անկյուններից, և փորձում են իրենց հնարավորությունների սահմաններում աջակցել ՀՀ կառավարությանը Հայաստան տեղափոխված սիրիահայերի հիմնախնդիրների լուծման, Հայաստանում վերջիններիս հաստատվելու և լիարժեք ինտեգրման գործում:

Մեկ անգամ ևս մեր երախտիքի խոսքն ենք ուղղում ձեզ՝ խմբին և դրա անդամներին մաղթելով շարունակական համագործակցություն և նորանոր համատեղ նախաձեռնություններ:

ՀՀ ՍՓՅՈՒՌՔԻ ՆԱԽԱՐԱՐՈՒԹՅՈՒՆ