Բելգիայի Լիեժ քաղաքի «Մեսրոպ Մաշտոց» միության դպրոցի աշակերտները մասնակցում են ՀՀ սփյուռքի նախարարության «Դու ինչ ես անում Ղարաբաղի համար» համահայկական շարժմանը:

Հիշեցնենք, որ դեռևս այս տարվա մայիսին Բելգիայի Լիեժ քաղաքի «Մեսրոպ Մաշտոց» միությունը օգնության դրամահավաք էր կազմակերպել՝ աջակցելու Ադրբեջանի կողմից հրահրած ապրիլյան քառօրյա պատերազմի հետևանքով զոհված հայ զինվորների ընտանիքներին: Այս մասին «Հայերն այսօրին» հայտնել էր միության նախագահ Լուսինե Ներսիսյանը:

Համայնքի և միության աջակցությամբ, ինչպես նաև դրամահավաքի կազմակերպիչ Գայանե Սարգսյանի գործուն մասնակցությամբ Լիեժ, Բիլզեն և Տոնգերեն քաղաքների հայ համայնքներից հանգանակվել է  1200 եվրո գումար, որի արդյունքում որոշվել է օգնություն տրամադրել 3 զոհվածների` Արամ Աբրահամյանի (Արմավիրի մարզի Արտիմեդ գյուղ), Ադամ Սահակյանի (ք. Երևան) և Մանվել Գևորգյանի (ք. Երևան) ընտանիքներին՝ յուրաքանչյուրին 400 եվրո: