Մեծարգո´յ եւ ազնւափայլ տկն. Յակոբեան.

 Առիթը պատեհ համարելով՝ մէկ անգամ եւս շնորհաւորում եմ Ձեր գլխաւորած գերատեսչութեան՝ Սփիւռքի նախարարութեան 5-ամեակը, որը Ձեր աշխոյժ ջանքերի շնորհիւ համախմբեց եւ իմաստաւորեց սփիւռքեան բազմերանգ համայնքների գոյութիւնը:

Մաղթում եմ Ձեզ կրկնակի ուժ ու եռանդ Ձեր ազգանւէր գործում ու ամենակարեւորը՝ ամենայն բարիք եւ առողջութիւն:

Տկն. Նախարա´ր, եւս մի կարեւոր հարցի շեշտադրում.  Դուք՝ որպէս ղեկավար անհատականութիւն, միշտ կարեւորութեամբ եւ մեծ բծախնդրութեամբ էք ուշադրութեան արժանացրել մեզ՝ որպէս օրաթերթի, եւ յատկապէս ինձ՝ որպէս խմբագրի. 5-ամեակի միջոցառման անհատական հրաւէրը Ձեր անունից դրա խօսուն վկայութիւնն է: Բայց Դուք, անշուշտ, քաջատեղեակ էք սփիւռքեան մեր առօրեայ պայմաններին, եւ դրան այս անգամ զուգակցւել է անձնական ծրագրային խճողումները, ու ցաւօք, մինչեւ վերջին պահը չկարողացայ համադրութիւններ իրականացնելով՝ ներկայ գտնւելու Ձեր նախաձեռնած գլխաւոր միջոցառումներին, որի համար հայցում եմ Ձեր ներողամտութիւնը եւ յայտնում իմ խորազգաց շնորհակալութիւնները Ձեր ուշադրութեանը արժանանալու եւ հրաւէրի համար:

Վստահ եմ, որ նոր նախաձեռնութիւնները եւ միջոցառումները չեն ուշացնի մօտ ապագայում հանդիպման առիթները:

Մէկ անգամ եւս ներողամտութիւն յայտնելով՝ Ձեզ մաղթում եմ յաջողութիւններ եւ արգասաբեր նորանոր ծրագրերի իրագործում:

Ամենայն յարգանքներով ՝
«Ալիք» օրաթերթի գլխաւոր խմբագիր
ԴԵՐԵՆԻԿ ՄԵԼԻՔԵԱՆ