Հոկտեմբերի 8-ին ՀՀ սփյուռքի նախարարությունում տեղի ունեցավ հեռակոնֆերանս Ստավրոպոլի  ‹‹Նաիրի›› ազգամշակութայինինքնավարության ներկայացուցիչների հետ, որին մասնակցում էին ՀՀ սփյուռքի նախարարության  Մերձավոր սփյուռքի հետ կապերի վարչության պետ՝ Տարոն Շագոյանը, նախարարության համապատասխան ստորաբաժանումների ղեկավարներ, աշխատակիցներ:

Ստավրոպոլի ‹‹Նաիրի›› ազգամշակութային ինքնավարությունը ներկայացնում էին  ինքնավարության նախագահ Միքայել Բեյրյումովը, ինքնավարության տնօրեն Անտոն Վարդանյանը, ‹‹Նաիրի›› ազգամշակութային ինքնավարության խորհրդի անդամ Աննա Բաղդասարովան և այլք:

Միքայել Բեյրյումովը ներկայացրեց ինքնավարության գործունեությունը, առկա խնդիրները, առաջիկա ծրագրերը: Նա նշեց, որ ավելի քան 400 անդամ ունեցող ինքնավարությունը իրականացնում է  հայկական մշակույթի, ավանդույթների և մայրենի լեզվի պահպանմանը միտված բազմաթիվ միջոցառումներ:

Նա նաև հավելեց, որ ինքնավարության  ներկայացուցիչները սերտորեն համագործակցում են Երևանի պետական համալսարանի, ՀՀ գիտությունների ազգային ակադեմիայի և մի շարք այլ հաստատությունների հետ:

Բեյրյումովը նշեց, որ մինչև տարեվերջ հայկական համայնքը կունենա նոր շենք, որտեղ կգործի նաև հայկական թանգարան:

ՀՀ սփյուռքի նախարարության համահայկական ծրագրերի վարչության պետ Գագիկ Գյանջումյանը ներկայացրեց գերատեսչության  ծրագրերը և հույս հայտնեց, որ Ստավրոպոլի հայ համայնքը՝ մասնավորապես երիտասարդներն ակտիվ կներգրավվեն նախարարության կողմից իրականացվող ծրագրերում:

Քննարկվեց նաև Սփյուռքի կրթական հաստատությունների համար գրականության և ուսումնաօժանդակ նյութերի մշակման և տրամադրման ծրագրի շրջանակում Ստավրոպոլի հայկական կիրակնօրյա դպրոցին   համապատասխան  գրականությամբ և ուսումնաօժանդակ նյութերով ապահովելու հարցը:

Հանդիպման ավարտին տեղի ունեցավ հարց ու պատասխան, մտքերի փոխանակում: