Ազգային ժողովը քվեարկությամբ վավերացրեց ՀՀ­-ի եւ Վերակառուցման ու զարգացման եվրոպական բանկի միջեւ 2015 թ. մայիսի 11­-ին ստորագրված «Երեւանի քաղաքային լուսավորության ծրագիր» վարկային համաձայնագիրը: Ինչպես հաղորդում է «Արմենպրես»­-ը, համաձայնագրին կողմ քվեարկեց 103, դեմ 5, ձեռնպահ՝ 6 պատգամավոր:

Քվեարկությունից առաջ վարման կարգի վերաբերյալ ելույթ ունեցավ ԲՀԿ խմբակցության պատգամավոր Միքայել Մելքումյանը, ով հայտնեց, որ ԲՀԿ­ն կողմ է քվեարկելու համաձայնագին, քանի որ այն միտված է Երևանի զարգացմանը:

ԲՀԿ խմբակցության քարտուղար Վահե Էնֆիաջյանը ևս նշեց, որ ԲՀԿ­ն կողմ է համաձայնագրին՝ ընդգծելով, որ հիմնական զեկուցողը մանրամասն ներկայացրել է, թե որտեղ են ծախսվելու վարկային միջոցները:

Համաձայնագրով նախատեսվում է, որ Վերակառուցման եւ զարգացման եվրոպական բանկը Հայաստանին կտրամադրի 4 մլն ԱՄՆ դոլարի չափով վարկ: Ծրագրի կապիտալ արժեքը կազմում է 7 մլն դոլար, որից 3 մլն դոլարը՝ դրամաշնորհ: Ծրագրի հիմնական նպատակն է Երեւանում ունենալ էներգախնայող եւ անվտանգ արտաքին լուսավորության ցանց: Մասնավորապես նախատեսվում է Երեւանի 28 փողոցներում փոխարինել հենասյուները, անցկացնել ստորգետնյա մալուխներ, օգտագործել էներգախնայող լամպեր, ինչպես նաեւ ներդնել կառավարման ավտոմատացված համակարգ: