Հուլիսի 27-ին Ն.Ս.Օ.Տ.Տ. Արամ Ա Կաթողիկոսն այցելեց Զմմառի վանք՝ գահակալության առիթով շնորհավորելու նորընտիր Հայ Կաթողիկէ   Գրիգոր-Պետրոս Ի. Կաթողիկոս-Պատրիարքին:  Այս մասին «Հայերն այսօրը» տեղեկանում է Լիբանանի իր աղբյուրներից:

Նորին Սրբությանն ուղեկցում էին Լիբանանի թեմի առաջնորդ գերաշնորհ Տեր Շահե եպս. Փանոսյանը, Բերիո թեմի առաջնորդ գերաշնորհ Տեր  Շահան եպս. Սարգիսյանը,  Տպարանի տեսուչ գերաշնորհ Տեր Նորայր եպս. Աշըգյանը և Միջեկեղեցական բաժնի վարիչ գերապատվելի  Տեր Հուսիկ Ծայրագույն վրդ. Մարտիրոսյանը:

Նորընտիր Պատրիարքը դիմավորեց Արամ Ա-ին և «Հրաշափառ»-ի ուղեկցությամբ առաջնորդեց  Մատուռ: Ապա վանքի հանդիսությունների սրահում Վեհափառ Հայրապետը շնորհավորեց Գրիգոր-Պետրոս Ի. Կաթողիկոս-Պատրիարքին և շեշտեց միասնաբար գործակցության հրամայականը՝ հատկապես Միջին Արևելքում ստեղծված ներկա իրավիճակում:

Նորընտիր Կաթողիկոս-Պատրիարքը շնորհակալություն հայտնեց Արամ Ա-ին այցելության համար և նշեց, որ Վեհափառ Հայրապետի հովվապետության քսանամյա փորձառությունից մեծապես պետք է օգտվի՝ այս դժվարին պայմաններում ժողովրդին հովվելու առաքելության մեջ: