Հունիսի 22-ին  ԵՊՀ մշակույթի կենտրոնում ՀՀ սփյուռքի նախարարության «Սփյուռք» ամառային դպրոցի ազգային երգի ու պարի խմբավարների, պարուսույցների վարպետության դասընթացների մասնակիցները հանդիպեցին  Վանուշ Խանամիրյանի անվան Հայաստանի պարարվեստի գործիչների միության նախագահ Գագիկ Մխիթարյանի հետ: Հանդիպման սկզբում վերջինս դպրոցի մասնակիցներին ծանոթացրեց միության ստեղծման պատմությանը, անցած ուղուն, ներկայացրեց ծավալած գործունեությունն ու ձեռքբերումները:

Կարևորելով ՀՀ սփյուռքի նախարարության  կողմից իրականացվող «Սփյուռք» ամառային դպրոց ծրագիրը` պարոն Մխիթարյանը նշեց. «Կարծում եմ` նման հանդիպումները կարելի է ընդհանուր մեթոդական քննարկում համարել, որի ընթացքում կփորձեմ ձեզ հետ կիսվել իմ կենսափորձով և մասնագիտական խորհուրդներ տալ: Իմացե՛ք, որ հայկական ազգային պարերը բոլոր ժամանակներում ուղեկցել են  հայ ժողովրդին: Ձեր համայնքում հայ երիտասարդներին սովորեցնելով հայկական պարերը՝ օգնում եք նրանց, որ այդ միջոցով նույնպես  կարողանան պահպանել իրենց ինքնությունը: Շարունակե՛ք ձեր ազգանվեր առաքելությունը»:

Ծրագրի մասնակիցներին ներկայացվեց նաև Հայաստանի պարարվեստի գործիչների միության անդամ դառնալու կարգը, որից հետո շատերը ցանկություն հայտնեցին անդամագրվել միությանը:

Այնուհետև Գագիկ Մխիթարյանը պատասխանեց Սփյուռքից ժամանած ազգային երգի ու պարի խմբավարներին, պարուսույցներին հուզող հարցերին, լսեց նրանց առաջարկները:

Հանդիպման ընթացքում քննարկվեցին նոր համագործակցություններին, համատեղ իրականացվող ծրագրերին առնչվող մի շարք հարցեր: