Իտալական կինոյի ճանաչված և սիրված դերասանուհի Օռնելա Մուտին խոստովանեց, որ ոչ մի երկրում այնպես չի հուզվել, ինչպես Հայաստանում:

Երևանյան «Ոսկե ծիրան» 12-­րդ միջազգային կինոփառատոնի պատվավոր հյուրն այս մասին նշեց հուլիսի 13­-ին՝ իր մասնակցությամբ «Սվանի սերը» կինոնկարի երևանյան պրեմիերային: «Հայաստանում բոլորը բոլոր լեզուներով խոսում են: Հետևաբար, ժամանակ առ ժամանակ խառնում եմ անգլերենը, ֆրանսերենը, գերմաներենը: Երեկ ասուլիսին ասացի, որ «Սվանի սերը» շատ ռեժիսորներ են փորձել նկարահանել, և երկար տարիներ: Վերջապես մենք կարողացանք անել դա: Հույս ունեմ, որ ձեզ այն դուր կգա»,­ «Արմենպրես»­-ի փոխանցմամբ՝ նշեց Օռնելա Մուտին:

Անվանի դերասանուհին հուլիսի 13-­ի երեկոյան մեկնել է Հայաստանից: «Ես շատ եմ ճանապարհորդում աշխարհում, և միշտ լավ ընդունելության եմ արժանանում: Բայց Հայաստանում ավելի շատ հուզվեցի, քան որևէ այլ երկրում: Այստեղ կա խորհուրդ, դաստիարակություն, հարգանք և սեր, որն ինձ ցույց տվեցիք: Շնորհակալություն»,­ նշեց անվանի դերասանուհին: Իտալացի կինոաստղ Օռնելա Մուտին իր կինոդեբյուտն արեց 1970 թվականին՝ «Ամենագեղեցիկ կինը» ֆիլմով:

Հայտնի գեղեցկուհին հիմնականում նկարահանվել է եվրոպական ֆիլմերում: Առավել հայտնի աշխատանքներից են գերմանական նոր կինոյի հայրերից մեկի` Ֆոլկեր Շլյոնդորֆի «Սվանի սերը» (1984) ֆիլմում կերտած նրա կերպարը: «Սվանի սերը»Մարսել Պրուստի «Կորուսյալ ժամանակների որոնումներում» առաջին գրքի էկրանավորումն է, որտեղ Մուտիի խաղընկերներն են Ջերեմի Այրոնսը և Ալեն Դելոնը: 1985­ին կինոնկարն առաջադրվեց ԲԱՖՏԱ մրցանակաբաշխության երկու անվանակարգում: Մուտին նկարահանվել է նաև անվանի իտալացի ռեժիսորներ Մարկո Ֆերրերի և Դինո Ռիզզիի ֆիլմերում: Սակայն հայ հանդիսատեսին նա առավելապես ծանոթ է «Անսանձի սանձահարումը» (1980) կատակերգական ֆիլմից, որտեղ նա խաղում է Ադրիանո Չելենտանոյի հետ: Օռնելա Մուտին Կաննի կինոփառատոնի մշտական պատվավոր հյուրերից է: