Իտալական ֆիլմի ճանչցուած եւ սիրուած դերասանուհի Օռնելա Մութին խոստովանեցաւ, որ որեւէ այլ երկրի մէջ այնպէս չէ յուզուած, ինչպէս Հայաստանի մէջ:

Երեւանեան «Ոսկէ ծիրան» 12-­րդ միջազգային ֆիլմի փառատօնին պատուաւոր հիւրը այս մասին նշեց Յուլիս 13­-ին` իր մասնակցութեամբ «Սուանի սէրը» շարժանկարի երեւանեան անդրանիկ ցուցադրութեան: «Հայաստանի մէջ բոլորը բոլոր լեզուներով կը խօսին: Հետեւաբար, ժամանակ առ ժամանակ կը խառնեմ անգլերէնը, ֆրանսերէնը, գերմաներէնը: Երէկ ասուլիսին ըսի, որ «Սուանի սէրը» շատ բեմադրիչներ փորձած են նկարահանել, եւ երկար տարիներ: Վերջապէս մենք կրցանք ընել այդ: Յոյս ունիմ, որ կը սիրէք այն,­ «Արմէնփրէս»­-ի փոխանցմամբ` նշեց Օռնելա Մութին:

Անուանի դերասանուհին Յուլիս 13-­ի երեկոյեան մեկնած է Հայաստանէն: «Ես շատ կը ճամփորդեմ, եւ միշտ լաւ ընդունելութեան կ’արժանանամ: Բայց Հայաստանի մէջ աւելի շատ յուզուեցայ, քան որեւէ այլ երկրի մէջ: Այստեղ կայ խորհուրդ, դաստիարակութիւն, յարգանք եւ սէր, որ  ցոյց տուիք ինծի: Շնորհակալութիւն»,­ նշեց անուանի դերասանուհին: Իտալացի ֆիլմի աստղ Օռնելա Մութին ֆիլմի իր  առաջին ելոյթը  ըրաւ 1970 թուականին` «Ամենագեղեցիկ կինը» ֆիլմով:

Յայտնի գեղեցկուհին հիմնականին մէջ նկարահանուած է եւրոպական ֆիլմերու մէջ: Առաւել յայտնի աշխատանքներէն են գերմանական նոր ֆիլմի հայրերէն մէկուն` Ֆոլկեր Շլեոնտորֆի «Սուանի սէրը» (1984) ֆիլմին մէջ կերտած անոր կերպարը: «Սուանի սէրը» Մարսէլ Փրուստի «Կորուսեալ ժամանակներու որոնումներուն» առաջին գիրքի նկարահանումն է, ուր Մութիի խաղընկերներն են Ճերեմի Այրոնսը եւ Ալէն Տելոնը: 1985­ին ֆիլմը առաջադրուեցաւ ԲԱՖՏԱ մրցանակաբաշխութեան երկու անուանակարգի մէջ: Մութին նկարահանուած է նաեւ անուանի իտալացի բեմադրիչներ Մարքօ Ֆերրերի եւ Տինօ Ռիզզիի ֆիլմերուն մէջ: Սակայն հայ հանդիսատեսին ան առաւելապէս ծանօթ է «Անսանձի սանձահարումը» (1980) կատակերգական ֆիլմէն, ուր ան կը խաղայ Ատրիանօ Չելենտանոյի հետ: Օռնելա Մութին Քաննի փառատօնի մշտական պատուաւոր հիւրերէն է: