Հինգշաբթի` մայիսի 28-ի երեկոյան, Նոր Ջուղայի Հայ մարզա-մշակութային «արարատե միության կենտրոնատեղիում մեծ շուքով նշվեց Հայաստանի առաջին Հանրապետության 97-ամյակը:

Երեկոն սկսվեց  հանդիսավարուհի Սոսե Պողոսյանի  ողջույնի և շնորհավորանքի խոսքերով, որից հետո  Ն. Ջ. Հայ Մ. Մ. «Արարատ» միության սկաուտական միավորի միջոցով կատարվեց դրոշակի արարողությունը, ապա Իրանի  իսլ.  Հանրապետության և Հայաստանի Հանրապետության դրոշների ներքո  հնչեց  երկու երկրների պետական  հիմները:

Հաջորդիվ Սպահանի հայոց  թեմի առաջնորդ Տ. Բաբգեն արքեպիսկոպոս Չարյանի նախագահությամբ եւ  հոգևորականաց դասի ու Արմեն Ամիրխանյանի ղեկավարությամբ աշխատող` Ս. Ամենափրկիչ վանքի «Կոմիտաս» երգչախմբի մասնակցությամբ  տեղի ունեցավ  Հանրապետական մաղթանք: Այնուհետև  ՀՀ պետական դրոշի  և Հայաստանի  առաջին Հանրապետության հիմնադիր` Արամ Մանուկյանի մեծադիր պատկերի առջև կատարվեց հանդիսավոր շքերթ` մասնակցությամբ թեմի ազգային իշխանության և ազգային այլ մարմինների ներկայացուցիչների, շրջանի Հայ Դատի հանձնախմբի, Հայոց ազգային դպրոցների աշակերտության ու ուսուցչական կազմերի և համայնքում գործող միությունների ու ենթամարմինների ներկայացուցիչների, որոնց ընդունեցին Թեմակալ առաջնորդը, թեմի Պատգամավորական ժողովի, Թեմական և Կրոնական  խորհուրդների ատենապետները եւ շրջանի Հայ դատի հանձնախմբի ներկայացուցիչը:

 ՀՀ հիմնադրման 97-ամյակի  նշման Նոր Ջուղայի հանձնախմբի խոսքն ընթերցեց Մարգարիտ Դավթյանը և «Ռուբեն» երիտասարդական միության խոսքը Նինելիա Աբրահամյանը , որից հետո բանախոսությամբ ելույթ ունեցավ, ազգային հասարական վաստակավոր գործիչ Սոնիկ Բաղումյանը:

Պաշտոնական բաժնի ավարտը հանդիսացավ թեմակալ առաջնորդ Տ. Բաբգեն արք. Չարյանի  հայրական պատգամը: Գեղարվեստական բաժնում, ազգային-հայրենասիրական երգերի կատարմամբ հանդես եկավ Հայաստանից ժամանած վաստակավոր երգչուհի Լեյլա Սարիբեգյանը: Ընթացքում երգերի և պարային համարներով ելույթ ունեցան  Ս. Ամենափրկիչ վանքի «Կոմիտաս» երիտասարդական երգչախմբի մեներգիչները, Նոր Ջուղայի Հայ մարզա-մշակութային «Արարատ» միության Մշակութային միավորի  Էստրադային խմբի անդամուհիներն և «Կռունկ» պարախումբը:  Տոնախմբությունը  եզրափակվեց հրավառությամբ:

Երանուշ Թահմազյան

Իրան-նոր Ջուղա

Լուսանկարները՝ Գևիկ Խաչատրյանի