Կնեսետի նախագահ Յուլի Էդելշտեյնը կոչ է արել վերանայել Իսրայելի դիրքորոշումը Հայոց ցեղասպանության հարցում՝ տեղի ունեցած սպանությունները մարդկության դեմ գնահատելով «բարոյական բիծ»:

«Պատմությունը չի կարող փոխվել: Դիվանագիտությունն այլևս չի կարող ստվերել աղետը»,­ ինչպես փոխանցում է «Արմենպրես»­-ը՝ վկայակոչելով The Jerusalem Post­-ը, Կնեսետում ունեցած ելույթի ժամանակ նշել է Էդելշտեյնը: Կնեսետի նախագահի խոսքով՝ գաղտնիք չէ, որ Իսրայելը Ցեղասպանության հարցում իր վրա է վերցրել հակասական դիրքորոշում: Էդելշտեյնն այդ դիրքորոշումն անվանել է «շատ անվճռական և շատ զուսպ»: «Որպես հրեա՝ մենք չենք կարող լռել։ Մենք չենք կարող աչք փակել կամ նվազեցնել հայկական ողբերգության չափը»,­ ասել է Կնեսետի նախագահը: