Հայոց ցեղասպանությունից 100 տարի անց Իսրայելը և, մասնավորապես, հրեա ժողովուրդը բարոյական պարտավորություն ունեն ճանաչելու հայերի ցեղասպանությունը: «Հոլոքստի ժամանակ մեկ երրորդին կորցրած ժողովուրդը չի կարող ժխտել մեկ այլ ժողովրդի նկատմամբ իրականացված ցեղասպանությունը, որը կորցրել է իր բնակչության երկու երրորդին»,- ինչպես հաղորդում է «Արմենպրես»-ը` վկայակոչելով i24news հեռուստաընկերության կայքը, այս մասին իր հոդվածում նշում է Իսրայելի Բար-Իլանի համալսարանի Միջին Արևելքի հարցերով մասնագետ և ավագ գիտաշխատող Էդի Քոհենը:

«ԱՄՆ 44 կոնգրեսականներ վերջերս բանաձև ներկայացրին ԱՄՆ Ներկայացուցիչների պալատ` կոչ անելով Օբամայի վարչակազմին հայկական հոլոքստը ճանաչել որպես ցեղասպանություն: Դեռևս հայտնի չէ, թե բանաձևը երբ է քվերակության դրվելու, սակայն, թվում է, թե Միացյալ Նահանգները շուտով միանալու է 20-րդ դարի ցեղասպանությունը պաշտոնապես ճանաչած երկրներին»,- գրում է հեղինակը` հավելելով, որ Իսրայելը երբեք պաշտոնապես չի ճանաչել Հայոց ցեղասպանությունը, իսկ այդ երկրի արտգործնախարարությունն իր քաղաքականությունը վարել է թուրքերին «չվշտացնելու» մտայնությամբ: Չնայած Հայոց ցեղասպանության հարցի կարևորությանը և հրեաների պատմության վրա ունեցած ազդեցությանը` շատ իսրայելցիներ անգամ տեղյակ չեն դրանից, քանզի լրատվամիջոցները միտումնավոր hետ են պահել հրեա հասարակությանը հայերի ողբերգության մասին իմանալու իրավունքից: