ՀՀ  սփյուռքի նախարար Հրանուշ Հակոբյանն ընդունեց Կալիֆորնիայի Հայ գրողների միության նախագահ Հակոբ Մկրտչյանին:

  Զրույցի ընթացքում Հ. Մկրտչյանը նախարարին ծանոթացրեց Կալիֆորնիայի հայ գրողների միության  գործունեությանը, նշելով, որ ներկայումս այն ունի շուրջ 50 անդամ:

  Ողջունելով հյուրին՝  նախարար Հ. Հակոբյանը  կարևորեց օտար երկրներում հայապահպանության, հայոց լեզվի տարածման և զարգացման  գործում հայ գրողի   դերը, ծանոթացրեց ՀՀ սփյուռքի նախարարության  կողմից  իրականցվող ծրագրերին, մասնավորապես,   էլեկտրոնային գրադարանի, հայերենի հեռակա ուսուցման և հայապահպանությանը նպաստող այլ ծրագրերի մասին: Նախարարը հորդորեց  ավելի մեծ  ուշադրություն նվիրել օտարագիր հայ գրողներին, քանի որ լսելով հայոց լեզուն, շփվելով հայկական մթնոլորտի հետ, նրանք առավել ևս կկապվեն  իրենց ազգային արմատներին և հայկականության ոգին կարտացոլեն իրենց ստեղծագործություններում:

  Խոսվեց նաև Հայաստանի հետ ամերիկահայ համայնքի կապերի ակտիվացման, հայկական դպրոցների վիճակի,  Ցեղասպանության 100-րդ տարելիցի շրջանակում իրականացվելիք ծրագրերի մասին:

  Հաշվի առնելով, որ փետրվարի 19-ը գիրք նվիրելու օրն է,  նախարար Հ. Հակոբյանը և Հ. Մկրտչյանը միմյանց գրքեր նվիրեցին: