Օսմանյան կայսրության իրականացրած Ցեղասպանությունից մեկ դար անց ճշմարտությունը պետք է ճանաչվի ողջ աշխարհի հանգստության համար: Այս մասին ասվում է La Nacion  արգենտինական պարբերականի խմբագրական հոդվածում, որը ներկայացրել է  Tert.am-ը:

«Հայոց ցեղասպանությունը տեղի է ունեցել մեկ դար առաջ՝ Օսմանյան կայսրությունում` Երիտթուրքերի կառավարության օրոք` 1915-1923 թվականներին: Այս իրադարձությունն այն նողկալի միջադեպերից է, որը հիշում է համաշխարհային պատմությունը, որը պայմանավորված էր 1.5-2 մլն հայի բռնի տեղահանությամբ:

Հաշվի չառնելով փաստավավերագրական ապացույցները` Թուրքիան մեկ դար շարունակ հերքում է կատարվածը` փորձելով խեղաթյուրել պատմությունը` պնդելով, որ  Ցեղասպանություն չի եղել, և թուրքերը մեղավոր չեն:

Այս առումով չպետք է ուշադրություն դարձվի ժխտողական քաղաքականության իրագործմանը, որին ուղղված հերթական քայլն էր ապրիլի 24-ը ազգային տոնակատարության օր հռչակելը` որպես Առաջին աշխարհամարտի ժամանակ Գալիպոլիի ճակատամարտի հաղթանակի օր:

Չպետք է մոռանանք պատմության այն դաժան պահերը, որոնց զոհ գնաց մեկուկես միլիոն հայ` ամենադաժան ճանապարհով:

Թուրքական կողմը խեղաթյուրում է պատմական իրադարձությունները` դրանք սխալ ներկայացնելով թուրքական հեռուստատեսության համար նախատեսված ֆիլմերում, որոնցից մեկը ցուցադրվում է անգամ մեր երկրում:

Հայոց ցեղասպանությունը չպետք է քողարկվի  կամ առավել ևս՝ ջնջվի պատմությունից:  Ժամանակն է հասնել նրան, որ Թուրքիայի իշխանությունները ճանաչեն այն»: