Օսմանեան կայսրութեան իրականացուցած Ցեղասպանութենէն մէկ դար անց ճշմարտութիւնը պէտք է ճանչցուի ողջ աշխարհի հանգստութեան համար: Այս մասին կ’ըսուի La Nacion  արժանթինական պարբերականի խմբագրական յօդուածին մէջ, որ կը ներկայացնէ  Tert.am-ը:

«Հայոց ցեղասպանութիւնը տեղի ունեցած է մէկ դար առաջ` Օսմանեան կայսրութեան մէջ` Երիտթուրքերու կառավարութեան օրօք` 1915-1923 թուականներուն: Այս իրադարձութիւնը այն նողկալի միջադէպերէն է, որ կը յիշէ համաշխարհային պատմութիւնը, որ պայմանաւորուած էր 1.5-2 մլն հայու բռնի տեղահանութեամբ:

Հաշուի չառնելով փաստավաւերագրական ապացոյցները` Թուրքիան մէկ դար շարունակ կը հերքէ կատարուածը` փորձելով խեղաթիւրել պատմութիւնը` պնդելով, որ  Ցեղասպանութիւն չէ եղած, եւ թուրքերը մեղաւոր չեն:

Այս առումով պէտք չէ ուշադրութիւն դարձուի ժխտողական քաղաքականութեան իրագործման, որուն ուղղուած հերթական քայլն էր Ապրիլ 24-ը ազգային տօնակատարութեան օր հռչակելը` իբրեւ Առաջին Համաշխարհային  պատերազմի ժամանակ Կալիփոլիի ճակատամարտի յաղթանակի օր:

Պէտք չէ մոռնանք պատմութեան այն դաժան պահերը, որոնց զոհ գնաց մէկուկէս միլիոն հայ` ամենադաժան ճանապարհով:

Թրքական կողմը կը խեղաթիւրէ պատմական իրադարձութիւնները` ատոնք սխալ ներկայացնելով թրքական հեռուստատեսութեան համար նախատեսուած ֆիլմերուն մէջ, որոնցմէ մէկը կը ցուցադրուի անգամ մեր երկրին մէջ:

Հայոց ցեղասպանութիւնը պէտք չէ քօղարկուի  կամ առաւել եւս` ջնջուի պատմութենէն:  Ժամանակը հասած է, որ Թուրքիոյ իշխանութիւնները ճանչնան այն»: