ԼՂՀ Ազգային ժողովի նախագահն այնուհետև Բրյուսելում ՀՀ դեսպան Թաթուլ Մարգարյանի ուղեկցությամբ այցելել է Մարիամ Մագթաղինացի հայկական եկեղեցի, հարգանքի տուրք մատուցել Հայոց ցեղասպանության զոհերի հիշատակին: Օրվա երկրորդ կեսին Աշոտ Ղուլյանը Եվրախորհրդարանում հանդիպել է Եվրոպայի «Ազատ  դաշինք» կուսակցության գործադիր տնօրեն Գյունտեր Դաուենին և նույն կուսակցության քաղաքական հարցերով խորհրդատու Եվա Բիդանիայի հետ։ Զրուցակիցները քննարկել են Արցախի քաղաքական համակարգի հետ Եվրոպայի «Ազատ դաշինք»-ի համագործակցության հնարավոր տարբերակներն ու հեռանկարները։ Նույն օրվա երեկոյան Եվրախորհրդարանի շենքում տեղի է ունեցել հանդիսավոր միջոցառում և ընդունելություն՝ նվիրված ԼՂՀ անկախության 23-րդ տարեդարձին։ Միջոցառմանը ներկա են եղել Կիպրոսի Հանրապետության խորհրդարանի խոսնակ Յաննակիս Օմիրուն, Եվրախորհրդարանի մեկ տասնյակից ավելի պատգամավորներ, ԵՄ-Հայաստան բարեկամության խմբի ղեկավար Էլենի Թեոխարուսը, «Հայաստանի եվրոպացի բարեկամներ» և Բրյուսելում տեղակայված միջազգային այլ կառույցների պատասխանատուներ։

Ազգային ժողովի նախագահը ներկայացրել է ԼՂՀ հռչակումից ի վեր հանրապետության ունեցած ձեռքբերումներն ու ներկայիս խնդիրները, ադրբեջանաղարաբաղյան հակամարտության կարգավորման ուղղությամբ ձեռնարկվող ջանքերը եւ եվրոպական կառույցների հետ համագործակցելու հնարավորությունները։ Երեկոյին ելույթ է ունեցել Եվրախորհրդարանի պատգամավոր Ֆրանկ Էնգելը, ով ողջունել է ԼՂՀ անկախության հերթական տարեդարձը և հայտարարել Եվրախորհրդարանում Արցախի հետ բարեկամության խումբ ստեղծելու անհրաժեշտության մասին:

Ողջույնի խոսքով միջոցառմանը հանդես են եկել նաև ՀՀ դեսպան Թաթուլ Մարգարյանը, Արևմտյան Եվրոպայի հայրապետական պատվիրակ, Բենիլյուքսի փոխանորդ Զատիկ վարդապետ Ավետիքյանը, ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը, Լյուվենի համալսարանի պրոֆեսոր Բեռնար Կուլին։