Արևմտահայերեն
Русский
EnglishՇուշիում կանցկացվի քանդակագործության միջազգային սիմպոզիում
Ընթացիկ տարվա օգոստոսի 10-ին Շուշիում կմեկնարկի «Հակոբ Գյուրջյան» քանդակագործության չորրորդ միջազգային սիմպոզիումը:
Այս մասին «Արցախպրես»-ի թղթակցի հետ զրույցում տեղեկացրել է «Շուշի քաղաքի թանգարաններ» ՊՈԱԿ-ի տնօրեն Լուսինե Գասպարյանը` հավելելով, որ արդեն ավանդական դարձած Շուշիում անցկացվող քանդակագործության սիմպոզիումը միջազգային համագործակցության, մշակութային ու մասնագիտական երկխոսության և ստեղծագործական ոգեշնչման հարթակ է արվեստագետների համար:
Սիմպոզիումի բացման արարողությունը տեղի կունենա օգոստոսի 10 –ին` Շուշիի Կերպարվեստի պետական թանգարանի պուրակում: Քանդակագործության չորրորդ միջազգային սիմպոզիումին կմասնակցեն տասնյակ քանդակագործներ` ԱՄՆ-ից, Չինաստանից, Լեհաստանից, ՌԴ-ից, Հայաստանից ու Արցախից:
«Քանդակագործության սիմպոզիումն առիթ է գեղեցիկ արվեստի շուրջ համախմբելու մեր հին ու նոր բարեկամներին, ստեղծելու արվեստի գործեր, որոնք Շուշիի մշակութային նոր կերպարի մաս կկազմեն և կհիշեցնեն գեղեցիկի ու հոգևորի հավերժության մասին»,- ասել է Լ. Գասպարյանը, նշելով, որ սիմպոզիումի կազմակերպիչներն են ԼՂՀ մշակույթի և երիտասարդության հարցերի նախարարությունը և «Ապագա սերունդների հիմնադրամ»-ը:
