Մարդու իրավունքների միջազգային ֆեդերացիան գնահատական է տվել ապրիլի սկզբին Ադրբեջանի ԶՈՒ կողմից հայ խաղաղ բնակիչների եւ զինծառայողների դեմ գործողություններին:

«Վերջին 30 տարում տարածաշրջանի ամենակործանարար կոնֆլիկտը Ղարաբաղյան հակամարտությունն է, որ շարունակում է խլել մարդկանց կյանքեր»,- այս մասին ասվում է FIDH-ի հայտարարությունում:

Ըստ միջազգային կառույցի` կոնֆլիկտը բավարար ուշադրության չի արժանանում միջազգային հանրության կողմից: Հայտարարությունում նշվում է, որ խաղաղ բնակիչների ու քաղաքացիական օբյեկտների վրա  հարձակումները  միջազգային իրավունքի խախտում են:

FIDH-ն առանձնացնում է ադրբեջանցի զինծառայողների կողմից 3 տարեցների  սպանությունն ու խոշտանգումը, ինչպես նաեւ  զինվոր Քյարամ Սլոյանի գլխատումը:

Ընդգծվում է, որ  ազգութամբ եզդի Քյարամ Սլոյանի` կտրված գլխի լուսանկարը  տեղադրվել է սոցցանցերում` ներկայացվելով որպես հաղթական ավար:

Հիշատակվում են նաեւ մյուս 2 գլխատված զինվորները:

Հայտարարության մեջ նշվում է, որ այս ամենը ռազմական հանցագործություն է:

«Սպանվածների մարմինների խոշտանգումը միջազգային մարդասիրական իրավունքի խախտում է»,- yerkir.am-ի փոխանցմամբ՝ հայտարարում է միջազգային կազմակերպությունը: