«Արի տուն» ծրագրի մասին քաջատեղյակ էի, քանի որ երեք տարի առաջ եղբայրս է մասնակցել: Հայաստանում անցկացրած օրերի մասին՝ միշտ վառ հիշողություններով էր ինձ պատմում»,-«Հայերն այսօրի» թղթակցի հետ զրույցում ասաց ՀՀ սփյուռքի նախարարության «Արի տուն»  ծրագրի 2-րդ փուլի մասնակից Արթուր Միհրանյանը և հավելեց, որ եղբոր հետաքրքրաշարժ պատմություններն են շարժառիթ հանդիսացել, որ ծրագրին մասնակցելու ցանկություն հայտնի:

Արթուր Միհրանյանը Ախալցխայից է: Նրա նպատակն է շրջայցերի ժամանակ հայոց պատմությունից, հայ ժողովրդից հնարավորինս շատ տեղեկություններ ստանա, որպեսզի Հայաստանի մասին գիտելիքների հարուստ պաշար ամբարի:

Արթուրը նաև նոր ծանոթությունների սիրահար է: Հույս ունի, որ ծրագրի շրջանակներում Սփյուռքի տարբեր համայնքներից ժամանած  հասակակիցների հետ կհաջողի ընկերական շրջապատն ընդլայնել, որոնց հետ հետագայում սերտ կապի մեջ կգտնվի:

Արթուր Միհրանյանը նախկինում բարեկամներին տեսնելու համար եկել է Հայաստան, սակայն հնարավորություն չի ունեցել ծանոթանալու  Հայաստանի եկեղեցական, պատմամշակութային վայրերին:

«Արի տուն ծրագրում ես այնպիսի վայրեր այցելեցի, որոնք նախկինում միայն համացանցի միջոցով էի տեսել: Այդ վայրերում լինելը՝ երազանքս էր: Այցելածս վայրերից ինձ հոգեհարազատ դարձավ «Զվարթնոց» տաճարը, որի ավերակներն ինձ վրա մեծ տպավորություն թողեցին»,-ասաց Արթուրը:

Արթուրը, խոսելով Ախալցխայի հայ համայնքում կազմակերպվող մշակութային միջոցառումների մասին, նշեց, որ դրանք նպաստում են հայ երիտասարդների ինքնության պահպանմանը: Առանձնակի ուշադրություն է դարձվում եկեղեցական, պետական և ազգային տոները նշելուն:

Արթուրն ազատ ժամանակ բռնցքամարտով է զբաղվում, նախկինում նաև հայկական պարի դասընթացների է հաճախել:

Գևորգ Չիչյան