Ապրիլի 18-ին ՀՀ սփյուռքի նախարարությունում նախարար Հրանուշ Հակոբյանի ղեկավարությամբ տեղի ունեցավ գործակարգավարական խորհրդակցություն, որին մասնակցում էին նախարարի տեղակալներ Սերժ Սրապիոնյանը և Վահագն Մելիքյանը, աշխատակազմի ղեկավար Ֆիրդուս Զաքարյանը, կառուցվածքային ստորաբաժանումների, «Հայրենիք-Սփյուռք կենտրոն» ՊՈԱԿ-ի, «Իմ Հայաստան» փառատոնի, «Հայերն այսօր» էլեկտրոնային պարբերականի ղեկավարները:

 Նախարարը կարևորեց Սփյուռքում Հայոց ցեղասպանության 101-րդ տարելիցը հավուր պատշաճի նշելու ուղղությամբ տարվող աշխատանքները համակարգելը և հանձնարարեց նպաստել Արցախի պաշտպանության բանակին և տուժած բնակչությանը աջակցելու գործում սփյուռքյան կառույցների ու կազմակերպությունների կողմից իրականացվող ծրագրերը կյանքի կոչելուն, աշխատել՝ դրսևորելով հետևողականություն, սերտորեն համագործակցելով Սփյուռքի հետ:

 Կառուցվածքային ստորաբաժանումների ղեկավարները ներկայացրին Արցախում տեղի ունեցող իրադարձությունների հետ կապված Սփյուռքի կառույցների ու կազմակերպությունների, համայնքների կողմից իրականացվող միջոցառումներն ու ձեռնարկները, զեկուցեցին ցուցաբերած հումանիտար օգնության և ֆինանսական աջակցության մասին:

 Ներկայացվեցին շաբաթվա ընթացքում նախարարության ծրագրերի շրջանակներում կատարած ընթացիկ աշխատանքները: Քննարկվեցին նախարարության ծրագրերը համայնքներում տեղայնացնելու, և առաջիկա միջոցառումների կազմակերպմանն առնչվող հարցեր:

Տրվեցին նոր հանձնարարականներ, դրանք ժամանակին, արդյունավետ ու հետևողականորեն կատարելու ցուցումներ: