Մարտի 16–ին ընդամենը 3000 հոգանոց հայկական համայնք ունեցող Կիպրոսի Հանրապետությունում մեծ ոգևորությամբ էին սպասում ՀՀ Նախագահ Սերժ Սարգսյանի գլխավորած պաշտոնական պատվիրակությանը, որի կազմում էր նաև ՀՀ սփյուռքի նախարար Հրանուշ Հակոբյանը: Մի շարք պաշտոնական հանդիպումներից հետո հայկական պատվիրակությունը մայրաքաղաք Նիկոսիայում այցելեց նաև հայկական «Նարեկ» վարժարան, ուր այս պահին 211 հայորդի է ուսանում:

1972 թվականին իբրև «Նարեկ» վարժարան վերակազմավորված կրթօջախը գործում է Կիպրոսի երեք քաղաքներում և հայեցի կրթություն է իրականացնում նախակրթարանի և միջնակարգ դպրոցի ծրագրերով:  Վարժարանը ակտիվ կերպով համագործացում է նաև ՀՀ սփյուռքի նախարարության հետ՝ մասնակցելով նախարարության ծրագրերին: Ինչպես «Հայերն այսօրի» հետ զրույցում նշեց վարժարանի տնօրեն Վերա Թահմազյանը, այս տարի ևս նարեկցիները կմասնակցեն Սփյուռքի նախարարության «Արի տուն» ծրագրին. նախնական տվյալներով՝ 16 պատանի կմասնակցի «Արի տուն-2016» հայրենաճանաչության ծրագրին:

Ի դեպ, վարժարանում ավանդույթ կա, որ ամեն տարի այդ տարեշրջանի շրջանավարտները ամռանն այցելում են Հայաստան՝ ծանոթանալու Հայրենիքի հետ:

ՀՀ նախագահի գլխավորած պատվիրակության այցի առիթով վարժարանի սաների ջանքերով մշակութային մեծ ծրագիր էր պատրաստվել, որի ընթացքում իրենց ելույթներով փայլեցին վարժարանի պարախմբի, երգչախմբի սաները: Միջոցառմանը, բացի հայկական պատվիրակության անդամներից, ներկա էին նաև մր շարք կիպրոսցի պաշտոնյաներ, ինչպես օրինակ՝ Կիպրոսի կրթության նախարարը, Ազգային փոքրամասնությունների պետական մարմնի ղեկավարը և այլք:

Ողջույնի խոսքով հանդես եկավ Վարժարանի հոգաբարձուների խորհրդի նախագահ Վարդան Թաշչյանը: Վարժարանի անունից ձիթենու ճյուղի պատկերով հուշանվեր հանձնվեց ՀՀ Նախագահին, իսկ Սերժ Սարգսյանն ի պատասխան Կոմիտասի մասին հրատարակություններ ու խտասալիկներ նվիրեց վարժարանի գրադարանին:

Հանդիսությունից հետո ՀՀ Նախագահի գլխավորած պատվիրակությունը հանդիպում ունեցավ հայ համայնքի ներկայացուցիչների հետ, որտեղ քննարկվեցին Հայաստան-Սփյուռք գործակցությանը, Հայաստանի արտաքին քաղաքականությանը և նոր մարտահրավերներին վերաբերող հարցեր:

Հայ համայնքի հետ հանդիպման ընթացքում ՀՀ Նախագահը Մովսես Խորենացի մեդալով պարգևատրեց «Կիպրահայեր» կայք էջի խմբագիր Սիմոն Այնեջյանին: Իսկ ահա համայնքի ամենատարեց սկաուտ Հարություն Անմահունին իր կողմից պարգև հանձնեց ՀՀ Նախագահին:

Հավելենք, որ Հարություն Անմահունին 5000 ԱՄՆ դոլար գումար է փոխանցել Արցախում զոհված հայ զինվորների մայրերին:

«Այս պատվավոր այցելությունները մեծ ուրախություն ու հպարտություն են մեզ համար: Սփյուռքում ապրող հայերիս համար պատիվ է այսպիսի ուրախ առիթներին պատրաստվելն ու հայրենիքիդ նախագահին դիմավորելը»,-«Հայերն այսօրի» հետ հեռախոսազրույցում ասաց «Նարեկ» վարժարանի տնօրեն Վերա Թահմազյանը: Խոսելով երեկվա միջոցառումների տպավորությունների մասին՝ տիկին Վերան ընդգծեց, որ համայնքը ուժ ու կորով ստացավ՝ շարունակելու հայապահպանության գործը: Նրա խոսքով՝ Սփյուռքում ապրող հայերի համար հպարտություն է գիտակցել, որ կա 25 տարվա անկախություն ունեցող հայկական պետություն և իրենց երազանքն է՝ Հայաստանը տեսնել հզոր ու բարգավաճ երկիր:

Վերա Թահմազյանը նաև շնորհակալություն հայտնեց ՀՀ սփյուռքի նախարարությանը՝ վարժարանին փոխանցված գրքերի համար, որոնց կարիքն իրենք շատ ունեին:

Ջուլիետա Մաթևոսյան