Հայաստանը ձեռնարկում է բոլոր անհրաժեշտ միջոցները զինված ընդհարումների դեպքում մշակութային արժեքների ապօրինի ներմուծման, արտահանման և սեփականության իրավունքի փոխանցման արգելումն ու կանխումն ապահովելու նպատակով: Այս մասին ասել է ՀՀ մշակույթի նախարար Հասմիկ Պողոսյանը՝ այսօր Սիրիայի Արաբական Հանրապետության մշակույթի նախարար Իսսամ Խալիլի հետ հանդիպման ժամանակ:

ՀՀ մշակույթի նախարարը ողջունել է Սիրիայի նախարար Իսսամ Խալիլին և կարևորել է նրա «Մտքի ավերածություն». խորագրով զեկույցը «Մշակութային ժառանգությունը` որպես մարդկային համախմբման և հոգևոր հաղորդակցման գործոն» կլոր սեղանի շրջանակում, տեղեկացնում են մշակույթի նախարարության մամուլի ծառայությունից:

Հասմիկ Պողոսյանն առաջարկել է համագործակցության ընդլայնում ՅՈՒՆԵՍԿՕ-ի կոնվենցիաների շրջանակում՝ նշելով, որ Հայաստանի Հանրապետությունը մտահոգված է Սիրիայում Իսլամական պետության կողմից մշակութային ժառանգությունը ոչնչացնելու խնդրով և շեշտել, որ ժամանակին չձեռնարկված քայլերը վատ նախադեպ են հանդիսանում նման վայրագությունների համար:

Սիրիայի մշակույթի նախարարը մտահոգություն է հայտնել զինված հակամարտության պատճառով պատմամշակութային հուշարձանների ոչնչացման առնչությամբ։

ՀՀ մշակույթի նախարարը կիսել է արաբ գործընկերոջ մտահոգությունը և հավելել, որ պետք է միավորել ուժերը՝ մշակութային վանդալիզմը կանխելու համար։ Հասմիկ Պողոսյանն արաբ գործընկերոջն առաջարկել է երկու երկրներում հայկական և սիրիական մշակույթի օրեր անցկացնել։ Նա շեշտել է, որ ուրախ կլինի, եթե արաբ գրողները մասնակցեն 2015թ. սեպտեմբերին Հայաստանում կայանալիք «Գրական տապան» միջազգային ծրագրին։

ՀՀ մշակույթի նախարարը շնորհակալություն է հայտնել Սիրիայի արաբական Հանրապետության կառավարությանը և մասնավորապես մշակույթի նախարար Իսսամ Խալիլին` Սիրիայում Հայոց ցեղասպանության 100-րդ տարելիցի հիշատակման միջոցառումների կազմակերպմանն աջակցելու համար՝ ընդգծելով Սիրիայի Ժողովրդական Ժողովի՝ մարտի 17-ին Հայոց ցեղասպանության 100-րդ տարելիցին նվիրված նիստ հրավիրելու փաստը: Նշելով, որ հայ-սիրիական պատմամշակութային հարաբերություններն իրենց արմատներով դարերի խորքն են գնում, Հասմիկ Պողոսյանն ընդգծել է, որ մասնավորապես Հայոց ցեղասպանության ժամանակ արաբ ժողովուրդն անգնահատելի օգնություն է ցուցաբերել բռնի տեղահանված հայ գաղթականներին:

Անդրադարձ է կատարվել Սիրիայի ներքաղաքական ճգնաժամի հետևանքով 2012թ. Հայաստան ներգաղթած մոտ տասներեք հազար սիրահայերի խնդիրներին:

Հասմիկ Պողսյանը Սիրիայի գործընկերոջը նաև տեղեկացրել է, որ Երևանի պետական համալսարանում 1968թ. գործում է Արևելագիտության ֆակուլտետը, որի կազմում է արաբագիտության ամբիոնը:

Հանդիպման ավարտին ՀՀ մշակույթի նախարարն արաբ գործընկերոջը նվիրել է Արևմտյան Հայաստանում ոչնչացված հուշարձանների մասին ժողովածու և հայկական ժայռապատկերների հազարամյա պատմությունը խորհրդանող հուշանվեր։