Հուլիսի 7-ին ՀՀ սփյուռքի նախարար Հրանուշ Հակոբյանն ընդունեց Երուսաղեմի Սրբոց Հակոբեանց Միաբանության պատրիարքական տեղապահ  բարձրաշնորհ Տեր Արիս արքեպիսկոպոս Շիրվանյանին:

 Ողջունելով հյուրին՝ ՀՀ սփյուռքի նախարարը կարևորեց Արիս սրբազանի՝ ամառային արձակուրդը Հայաստանում  անցկացնելու մտադրությունը և առաջարկեց այդ ընթացքում մասնակցել ՀՀ սփյուռքի նախարարության կողմից կազմակերպվող միջոցառումներին:

 Շնորհակալությամբ ընդունելով նախարարի առաջարկը՝ Արիս սրբազանը ցանկություն հայտնեց մասնակցել «Արևմտահայերենի և արևելահայերենի մերձեցման խնդիրները» համաժողովին, ինչպես նաև ապահովել Երուսաղեմից մասնագետների ներկայությունը:

 Անդրադարձ կատարվեց Թարգմանչաց և Ժառանգավորաց դպրոցներում ուսուցման կազմակերպման խնդիրներին, նախարարության ծրագրերին մասնակցող մանկավարժների ընտրությանը և հարակից այլ հարցերի:

Սրբազանը նախարարին տեղեկացրեց Հայոց ցեղասպանության 100-րդ տարելիցին նվիրված միջոցառումներին Պատրիարքարանի, Հայ համայնքի և Հայ դատի գրասենյակի ակտիվ մասնակցության և համագործակցության մասին:

 Նախարար Հրանուշ Հակոբյանը առաջարկեց օրակարգային հարց դարձնել Երուսաղեմի Սրբոց Հակոբեանց վանքի թանգարանում գտնվող ավելի քան 4000 ձեռագրերի և հնատիպ գրքերի թվայնացման հարցը՝ հետագա վտանգներից խուսափելու նպատակով:

 Քննարկեցին հայապահպանությանն ուղղված մի շարք այլ հարցեր: