Յուլիս 7-ին ՀՀ սփիւռքի նախարար Հրանոյշ Յակոբեան ընդունեց Երուսաղէմի Սրբոց Յակոբեանց Միաբանութեան պատրիարքական տեղապահ  բարձրաշնորհ Տէր Արիս արքեպիսկոպոս Շիրվանեանը:

 Ողջունելով հիւրը` ՀՀ սփիւռքի նախարարը կարեւոր համարեց Արիս սրբազանի` ամառնային արձակուրդը Հայաստանի մէջ  իրականացնելու մտադրութիւնը եւ առաջարկեց այդ ընթացքին մասնակցիլ ՀՀ սփիւռքի նախարարութեան կողմէ կազմակերպուող ձեռնարկներուն:

 Շնորհակալութեամբ ընդունելով նախարարի առաջարկը` Արիս սրբազանը ցանկութիւն յայտնեց մասնակցելու «Արեւմտահայերէնի եւ արեւելահայերէնի մերձեցման խնդիրները» համաժողովին, ինչպէս նաեւ ապահովել Երուսաղէմի մասնագէտներու ներկայութիւնը:

 Անդրադարձ կատարուեցաւ Թարգմանչաց եւ Ժառանգաւորաց դպրոցներուն մէջ ուսուցման կազմակերպման խնդիրներուն, նախարարութեան ծրագիրներուն մասնակցող մանկավարժներու ընտրութեան եւ յարակից այլ հարցերու:

Սրբազանը նախարարին տեղեկացուց Հայոց ցեղասպանութեան 100-րդ տարելիցին նուիրուած ձեռնարկներուն Պատրիարքարանի, Հայ համայնքի եւ Հայ դատի գրասենեակի աշխոյժ մասնակցութեան եւ համագործակցութեան մասին:

 Նախարար Հրանոյշ Յակոբեան առաջարկեց օրակարգային հարց դարձնել Երուսաղէմի Սրբոց Յակոբեանց վանքի թանգարանին մէջ գտնուող աւելի քան 4000 ձեռագիրներու եւ հնատիպ գիրքերու թուայնացման հարցը` յետագայ վտանգներէն խուսափելու նպատակով:

 Քննարկեցին հայապահպանութեան ուղղուած շարք մը այլ հարցեր: