Շարունակվում է  ՀՀ սփյուռքի նախարարության հայրենաճանաչության «Արի տուն»  ծրագրի  7-րդ փուլի մասնակիցների այցը  Հայաստանի պատմական և տեսարժան վայրեր :  Գառնու հեթանոսական տաճար և Գեղարդավանք այցի ընթացքում  արիտունցիներից մի քանիսի հետ զրուցել է «Հայերն այսօրի» թղթակիցը:

Անահիտ Ավետիսյան, 14 տարեկան,Մոսկվա

Ծնվել եմ Երևանում և մինչև Մոսկվա գնալս սովորել եմ հայկական դպրոցում: Երեք տարի առաջ ընտանիքով տեղեփոխվեցինք  Մոսկվա, որտեղ ես  սովորում եմ 9-րդ դասարանում: Բայց այս տարի եկել եմ Հայաստան, որպեսզի քոլեջ ընդունվեմ:

Երկու օր է արդեն շրջագայում եմ  «Արի տուն» ծրագրի  հետ ու արդեն հասցրել եմ ձեռք բերել  լավ ընկերներ:  Այստեղ եմ, որպեսզի հիշեմ ու չմոռանամ իմ հայրենի պատմությունը: Շատ եմ ուզում, որ ընտանիքով մնանք այստեղ ապրելու:  Շնորհակալ եմ «Արի տուն» ծրագրի կազմակերպիչներին՝  աշխարհի տարբեր ծայրերից եկած իմ հայրենակիցների հետ շփման   հնարավորության համար :

Ազատ Մկրտչյան, 14 տարեկան , Հոլանդիա

«Արի տուն» ծրագրին մասնակցելու եկել եմ քույրիկիս` Աննա Մկրտչյանի և մեր բարեկամուհու հետ. նրա անունը նույնպես Աննա է: Ծրագրի մասին մայրիկիս պատմել է մեր բարեկամուհին, նա էլ   ինձ և քույրիկիս գրանցել է ծրագրում: Ես եկել եմ Հայաստան, որպեսզի տեսնեմ Հայաստանի պատմամշակութային վայրերը, ինձ հատկապես  հետաքրքիր է Գառնու հեթանոսական տաճարը:

Հոլանդիայում տանը միշտ հայերեն ենք խոսում, որպեսզի ես և քույրիկս հիշենք ու չմոռանանք մեր հայկական արմատների մասին: Այնտեղ բոլորը գիտեն, որ ես հայ եմ, որովհետև ես համարյա միշտ հագնում եմ հայկական դրոշի գույներով հագուստ: Ուզում եմ  Հոլանդիայում ուսում ստանամ, հետո նոր վերադառնամ Հայաստան ապրելու:

Արթուր Հովակիմյան, 13 տարեկան,  Մոսկվա

Ծրագրին մասնակցում եմ, որպեսզի ծանոթանամ մեր հինավուրց եկեղեցիների պատմությանը, սովորեմ հայերեն ավելի լավ խոսել ու գրել, և ի վերջո վայելեմ Հայաստանի ջերմ արևը: «Արի տուն» ծրագրի մասին լսել եմ համացանցից, հետո ծանոթներիցս  մեկն ավելի մանրամասը պատմեց ծրագրի մասին, ես էլ որոշեցի եղբորս` Դավիթ  Հովակիմյանի հետ մասնակցել ծրագրին:

Այստեղ, բացի նոր գիտելիքներից,  ծանոթանում եմ տարբեր երկրներից ժամանած իմ հասակակից երեխաների հետ: Արդեն ընկերացել եմ Բստոնից Արսենի հետ: Ազատ ժամանակ սիրում եմ ֆուտբոլ խաղալ : Արսենի հետ պայմանավորվել ենք մի օր միասին ֆուտբոլ խաղալ: Երազանքս է   լավ ֆուտբոլիստ դառնալ :

Արսեն Պատվականյան, 18 տարեկան,  Բոստոն

Ես ծնվել եմ Բոստոնում,  այնտեղ հաճախել եմ հայկական դպրոց: Ինչպես Գառնու տաճարի, այնպես էլ Հայաստանի այլ պատմամշակութային վայրերի մասին  սովորել եմ դպրոցում, իսկ ծրագրին մասնակցելով` ավելի ամրապնդեցի գիտելիքներս: Հայստանում ամեն ինչ ինձ դուր է գալիս, հատկապես  մարդկանց ջերմ հայացքները միմյանց բարևելիս: Հուսով եմ մյուս տարի ևս ամառային արձակուրդներս կանցկացնեմ «Արի տուն» ծրագրի հետ :

Երբ վերադառնամ Բոստոն, ընդունվելու եմ համալսարան: Ազատ ժամանակ սիրում եմ ֆուտբոլ խաղալ.  Բոստոնի հայկական ֆուտբոլային թիմի կազմում եմ հանդես գալիս :  Շնորհակալ եմ Սփյուռքի նախարարությանը նման հնարավորության համար:

Պատրաստեց Տաթև Դավթյանը