27/02/2017   Սփյուռք   No comments

Մայրենիի տոնը Բուլղարիայի Կրջալի քաղաքի հայկական համայնքում

Փետրվարի 21-ին Պլովդիվում ՀՀ պատվավոր հյուպատոս Եղիազար Ուզունյանը և պատվավոր հյուպատոսի մշակութային հարցերով խորհրդական Աղավնի Գևորգյանը Մայրենիի տոնը նշել են Բուլղարիայի Կրջալի քաղաքում՝ հյուրընկալվելով հայկական համայնքում:

«Այդ փոքրիկ քաղաքի բնակիչների մեծամասնությունը թուրքեր են, հայերը շատ քիչ թիվ են կազմում, բայց ունեն փոքրիկ ակումբ, գործում է «Սևան» կազմակերպությունը: Տարին 2 անգամ պատվավոր հյուպատոս Եղիազար Ուզունյանը և ես հյուրընկալվում ենք քաղաքում, որպեսզի միասին նշենք մեծ նշանակություն ունեցող հայկական  տոները: Այս կերպ փորձում ենք համայնքի անդամներին մոտ պահել մեր ազգային տոներին, ավանդույթներին ու սովորույթներին»,- «Հայերն այսօր»-ի հետ զրույցում ասաց  Աղավնի Գևորգյանը:

Հավաք-հանդիպմանը ՀՀ պատվավոր հյուպատոսի մշակութային հարցերով խորհրդականը ներկայացրել է  Ղևոնդյան և Վարդանանց տոներին նվիրված փոքրիկ դասախոսություն, անդրադարձել է Մեսրոպ Մաշտոցի ստեղծած Հայոց այբուբենի պատմությանը, խոսել Աստվածաշնչի հայերեն թարգմանության մասին: Այդ ամենը համեմված է եղել լուսանկարներով և հայկական երաժշտությամբ:

«Հայկական համայնքի անդամները և իրենց բուլղար ընկերները մեծ հետաքրքրությամբ էին լսում պատմությունները: Հուսանք՝ այդ դասախոսության շնորհիվ մենք կարողացանք լուսավորել և վերանորոգել մեր հայրենակիցների ազգային զգացումները: Հանդիպումը շարունակվեց համայնքի ակումբում, որտեղ Բուլղարիայի այդ փոքրիկ քաղաքում ապրող հայերը ցուցադրեցին տարիներ շարունակ խնամքով պահված իրենց նախնիների լուսանկարները: Անչափ հուզիչ է հանդիպել փոքրիկ համայնքներում ապրող մեր հայրենակիցներին»,- ասաց Աղավնի Գևորգյանը:

Դասախոսությանը ներկա էին նաև «Սևան» կազմակերպության ղեկավար Հակոբ Ուզուն-Պողոսյանը և Կրջալիի քաղաքապետարանի ներկայացուցիչ Պետյա Նազարովան:

 Հանդիպման ավարտին Պետյա Նազարովան Բալկանյան պատերազմի 100-րդ տարելիցին և քաղաքի ազատագրմանը նվիրված պատկերագիրք  է նվիրել Եղիազար Ուզունյանին:

«Շատ հետաքրքիր պատկերագիրք էր, որտեղ լուսանկարների միջոցով ներկայացված էին նաև քաղաքի հայերի կյանքը՝ հայկական տարբեր տոնակատարությունները, ամենահին սրճարանը, որ հայերն ունեցել են և այլն: Այդ ամենը կմնա իբրև լավ հիշատակ՝ հաջորդ սերունդների համար: Պատկերագիրքը կցուցադրենք նաև Պլովդիվի մշակութային կենտրոնի հյուրերին»,- նշեց Աղավնի Գևորգյանը և հավելեց, որ Վարդանանց և Մայրենիի տոների առիթով Եղիազար Ուզունյանը նվիրատվություն է կատարել Պլովդիվի հայկական դպրոցին, որը կբաժանվի այն աշակերտներին, որոնք սիրով ու եռանդով են սովորում իրենց Մայրենին:

%d5%a2%d5%b8%d6%82%d5%ac%d5%b2%d5%a1%d6%80%d5%ab%d5%a14 %d5%a2%d5%b8%d6%82%d5%ac%d5%b2%d5%a1%d6%80%d5%ab%d5%a15%d5%a2%d5%b8%d6%82%d5%ac%d5%b2%d5%a1%d6%80%d5%ab%d5%a13%d5%a2%d5%b8%d6%82%d5%ac%d5%b2%d5%a1%d6%80%d5%ab%d5%a11 %d5%a2%d5%b8%d6%82%d5%ac%d5%b2%d5%a1%d6%80%d5%ab%d5%a12

No related posts.

Scroll Up