ԽՍՀՄ ԺՈՂՈՎՐԴԱԿԱՆ ԱՐՏԻՍՏՈՒՀԻ, ՀԱՅ ԺՈՂՈՎՐԴԻ ՄԵԾԱՆՈՒՆ ԶԱՎԱԿ ՎԱՐԴՈՒՀԻ ՎԱՐԴԵՐԵՍՅԱՆԻ ԸՆՏԱՆԻՔԻՆ, ԲԱՐԵԿԱՄՆԵՐԻՆ,ՀԱՅ ՀԱՍԱՐԱԿՈՒԹՅԱՆԸ

Մեծագույն ցավ ենք ապրում բոլորս: Մեզանից հեռացավ մեր սիրելի Վարդուհի Վարդերեսյանը, որի անզուգական տեսակի, տաղանդի, կանացի և մարդկային հմայքի բացակայությունը զգալու ենք անընհատ և ամենուր…

Վարդուհի Վարդերեսյանն իր ողջ կյանքը նվիրաբերել էր արվեստին` իր կերտած կերպարներով ներկայացնելով դերեր, որոնք ընդգծում էին մարդու հոգեկան պոռթ­կումները, ոգևորումն ու հիասթափությունը, սերն ու ատելությունը, սպասելիքն ու կորուստը, կարոտն ու հիացումը՝ հանդես գալով որպես ինքնատիպ, բռնկվող, անկեղծ, հաճախ նաև չափազանց ուղղամիտ անհատականություն:

Պատվով ու մեծ ներշնչանքով թե´ Հայրենիքում, թե´ Սփյուռքում տասնամյակներ շարունակ իրականացնելով լուսավոր գործունեություն՝ նա վառ էր պահում հայ դասական մշակույթի անմար կրակը:

Վարդուհի Վարդերեսյանը հայ թատրոն և կինո բերեց բոլորովին նոր տեսակ, նոր որակ՝ շնորհիվ իր դերասանական բացառիկ վարպետության, անզուգական ձայնի ու արևմտահայերենի կատարյալ իմացության` դառնալով հանդիսատեսի ամենապաշտելի դերասաններից մեկը:

Նրա հանդեպ սերն ու խոնարհումն անսպառ է, և այսօր աշխարհասփյուռ հայ ժողովուրդն է սգում նրա մահը:

ՀՀ սփյուռքի նախարարությունը ցավակցում է Վարդուհի Վարդերեսյանի ընտանիքի անդամներին, Գաբրիել Սունդուկյանի անվան ազգային ակադեմիական թատրոնի ողջ անձնակազմին, արվեստասեր հասարակությանն այս անդառնալի կորստի կապակ­ցությամբ:

 ՀՀ ՍՓՅՈՒՌՔԻ ՆԱԽԱՐԱՐ

 ՀՐԱՆՈՒՇ ՀԱԿՈԲՅԱՆ