Հռոմի Ֆրանչիսկոս Պապի կողմէ Ապրիլ 12-­ին Հայոց ցեղասպանութեան 100-­րդ տարելիցի առնչութեամբ մատուցուող պատարագը  նոր «ապտակ» մըն է  Թուրքիոյ համար: «Արմէնփրէս»­-ի փոխանցմամբˋ Ապրիլ 10­-ին լրագրողներուն հետ հանդիպման նման տեսակէտ յայտնեց ԱՄՆ Քալիֆորնիա նահանգի «Նորթրիճ» համալսարանի հայագիտական ծրագիրներու ղեկավար, դոկտոր, փրոֆէսոր Վահրամ Շեմմասեան:

Հայ փրոֆէսորի գնահատմամբ` Վատիկանի մէջ կայանալիք արարողութիւնը մեծ հնչեղութիւն եւ նշանակութիւն կը ստանայ: «Հռոմի Պապը հոգեւոր առաջնորդ է, սակայն անոր այս քայլը ոչ միայն հոգեւոր, այլ նաեւ քաղաքական մեծ նշանակութիւն ունի»,-­ պարզաբանեց Շեմմասեան: Ան ծիծաղելի համարեց Թուրքիոյ Նախագահ Էրտողանի որոշումըˋ Կալիպոլիի ճակատամարտի յաղթանակը նշել Ապրիլ 24­-ին, եւ աւելցուց, որ վաղ թէ ուշ այդ երկիրը ստիպուած պիտի ըլլայ ճանչնալու Հայոց ցեղասպանութիւնը:

Ինչ կը վերաբերի Հայոց ցեղասպանութեան 100­-րդ տարելիցի առնչութեամբ ԱՄՆ Քալիֆորնիա նահանգին մէջ կայանալիք արարողութիւններուն, ապա ամերիկահայ փորֆէսորը ըսաւ, որ ատոնք սկսած են դեռեւս նախորդ տարուընէ:

Ապրիլ 24­-ին Լոս Անճելըսի Հոլիւուտ շրջանին մէջ տեղի կ’ունենայ միջեկեղեցական հոգեհանգստեան արարողութիւն: Բացի այդ, կը նախատեսուի «Արդարութեան երթ»` մեծ թիւով հայերու մասնակցութեամբ: Հայոց
ցեղասպանութեան տարելիցի ձեռնարկները կը շարունակուին նաեւ Ապրիլ 25-­ինˋ ԱՄՆ տարբեր քաղաքներու մէջ: