Յունիս 28-ին Աղաւնաձորի մէջ տեղի ունեցաւ «Արի տուն-2013» ծրագիրի առաջին փուլի փակման հանդիսաւոր արարողութիւնը:

Ձեռնարկին ներկայ էին ՀՀ սփիւռքի նախարար Հրանոյշ Յակոբեան, ՀՀ վաստակաւոր արուեստագէտ, երգահան Արա Գէորգեան, գրող, հասարակական- քաղաքական գործիչ Լիլիթ Գալստեան:

Արիտունցիները ներկաներուն ողջունեցին ասմունքով, երգով ու պարով, իսկ վիրահայ Մարինա Շախտինարովայի կատարմամբ «Կռունկ» երգը զարմացուց ու յուզեց ներկաներուն:

Արիտունցիներուն հայրենասիրական երգերով ոգեւորեցին «Հայկազունք» խումբի երգիչները, որոնց կատարումներուն միացան նաեւ ծրագիրի մասնակիցներն ու հիւրերը:

ՀՀ սփիւռքի նախարար Հրանոյշ Յակոբեան ողջունեց «Արի տուն» կանչով հայրենիք եկած մասնակիցներուն եւ յոյս յայտնեց, որ անոնք կը դառնան իւրօրինակ կենդանի կամուրջ Հայաստանի եւ Սփիւռքի միջեւ. «Կարծում եմ, որ այս օրերին դուք շատ բան տեսաք ու սովորեցիք: Յոյս ունեմ, որ հայրենիքի սէրն ու ջերմութիւնը կը տանէք ձեր համայնքներ եւ կ’ոգեւորէ´ք, կը բոցավառէ´ք, ուժ կը տաք համայնքում ապրող հայ երիտասարդներին, որ նրանք էլ գան հայրենիք, մասնակցեն ծրագրին, ձեզ պէս ոգեւորուեն ու շարունակեն հայ մնալ ու սիրել Հայաստանը»:

Երեկոն աւարտեց աւանդական հրաժեշտի խարոյկին մօտ, որուն շուրջ մինչեւ ուշ երեկոյ կը պարէին, կ’երգէին ծրագիրի մասնակիցները, որոնք մէկ օր ետք հրաժեշտ պիտի տային հայրենիքին` նոր վերադարձի ակնկալիքով:

«Արի տուն» ծրագիրի 2013թ առաջին փուլին մասնակցեցան շուրջ 90 երիտասարդ  աշխարհի 10 երկրէ: