ՀՀ սփիւռքի նախարարութեան նախաձեռնութեամբ իրականացուող «Հայոց ցեղասպանութեան հետեւանքով միլիոնաւոր մանուկներ լոյս աշխարհ չեկան» խորագիրով ծրագիրին միացած են Հոլանտայի  Ալմելօ քաղաքի ՀԱԵ  «Սուրբ Մեսրոպ Մաշտոց» կիրակնօրեայ դպրոցի սաները:

Հոլանտահայ փոքրիկները լուսանկարուած են Եւրոպայի մէջ իր տեսակին մէջ եզակի Հայոց ցեղասպանութեան նուիրուած յուշահամալիրին մէջ:

Հայոց ցեղասպանութեան 100-րդ տարելիցին նուիրուած ծրագիրի նպատակն է 1,5 միլիոն երեխաներու կողմէ բարձրացուող բողոքը խարան դարձնել թուրքի ճակատին:

Տեղեկանք. Ալմելոյի Հայ Առաքելական Սուրբ Գրիգոր Լուսաւորիչ եկեղեցւոյ տարածքին մէջ գտնուող Հայոց Ցեղասպանութեան զոհերու յուշահամալիրը բացուած է 2014 թուականի Ապրիլ 24-ին:

Հայ Առաքելական Սուրբ Գրիգոր Լուսաւորիչ եկեղեցւոյ պատկանող հողին վրայ կառուցուած յուշահամալիրը ստեղծուած է հայկական եկեղեցիներու ճարտարապետութեան յատուկ ոճով` 16 սիւներու վրայ: Համալիրի հիմքը հանդիսացող տասնվեց տուֆէ խաչքարերը պատրաստուած են Հայաստանի մէջ: Վարպետը Սերգէյ Դանիէլեանն է:

Հայոց ցեղասպանութեան նահատակներու  յուշահամալիրի հեղինակ-նախաձեռնողը բարերար Քրիստիան Գելիճին է:

Յուշահամալիրը նուիրուած է ո´չ միայն Հայոց ցեղասպանութեան զոհերու յիշատակին, այլ նաեւ աշխարհին եւս մէկ անգամ սթափութեան կոչ կ’ուղղէ, որ նմանատիպ դէպքեր աշխարհի մէջ երբեք չկրկնուին:

Հոլանտայի Ալմելօ քաղաքին մէջ կը բնակի վեց հազար հայ: