Սպանիոյ մէջ Յունուար 21-ին բացուած է  «Անլռելի զանգակատուն. Հայաստան 1915 -1918»  շրջիկ ցուցադրութիւնը, որուն նպատակն է` Սպանիոյ մէջ տարածել եւ քարոզել  մէկուկէս միլիոն  քրիստոնեաներու  Ցեղասպանութիւնը` իրագործուած թուրք իսլամիստներու ձեռքով, կը գրէ Tert.am-ը:

Այս մասին ինչպէս կը յայտնէ madridgratis.net մատրիտեան պարբերականը` «Անլռելի զանգակատուն. Հայաստան 1915 -1918» ցուցադրութիւնը, որ տեղեկատուական բնոյթ կը կրէ, կազմակերպուած է «Մատրիտի հայեր» ընկերակցութեան  կողմէ` Սպանիոյ մէջ ՀՀ դեսպանութեան հովանիի ներքոյ:

«Առաջին անգամ է նմանօրինակ ձեռնարկ կը կազմակերպուի Սպանիոյ մէջ: Այն հնարաւորութիւն կ’ընձեռէ լուսանկարներու միջոցով աւելի լաւ  տեղեկացուած ըլլալու 1915-1918 թուականներուն Օսմանեան կայսրութեան կազմին մէջ տեղի ունեցած Հայոց ցեղասպանութեան մասին:  Ցեղասպանութիւնը իրականացուած է հայ ժողովուրդին նկատմամբ, որուն զոհ  գացած է 1.5 մլն մարդ, մնացեալ ողջ ժողովուրդն ալ տեղահանուած է իր պատմական բնակավայրէն»,- կը գրէ աղբիւրը` աւելցնելով.

«Այս երկար ու դժուարին  99  տարուան ընթացքին Ցեղասպանութիւնը չէ ընդունուած` ինչպէս որ պէտք է եւ կը շարունակէ հնչել իբրեւ «ոչ պաշտօնական» իրողութիւն մարդկութեան համար: Ցուցադրութեան նպատակն է` փոխել այս մտածելակերպը, այցելուներուն հնարաւորութիւն տալ` ճանչնալու 20-րդ դարու ամենամեծ յանցագործութիւնը` Մեծ եղեռնը»:

Ցուցադրութիւնը տեղի կ’ունենայ Մատրիտի շրջանի Ալքարա տէ Էնարես քաղաքի «Քինտա տէ Սերուանտես» սրահին մէջ, բաց է երեքշաբթիէն կիրակի օրերը: