Օրերս Սինկափուրի Սուրբ Գրիգոր Լուսաւորիչ եկեղեցւոյ մէջ Աւստրալիոյ եւ Նոր Զելանտիոյ Հայոց թեմի առաջնորդ Տ. Հայկազուն եպիսկոպոս Նաճարեան մատուցեց Սուրբ Պատարագ:

Պատարագի աւարտին Տ. Հայկազուն եպիսկոպոս Նաճարեան փոխանցեց, որ Ամենայն Հայոց Կաթողիկոս Գարեգին Բ-ի Սրբատառ կոնդակով Հայ առաքելական Սուրբ Եկեղեցւոյ «Սուրբ Ներսէս Շնորհալի» պատուոյ բարձր շքանշան  շնորհուած է Գրիգոր (Կրեկ) Պասմաճեանին:

Գրիգոր Պասմանճեան Սինկափուրի հայկական համայնքի հնաբնակներէն է: Երկար տարիներ եղած է Սուրբ Գրիգոր Լուսաւորիչ եկեղեցւոյ հոգաբարձուներու խորհուրդի նախագահ: Մեծ ներդրում  ունեցած է Սինկափուրի հայկական 179-ամեայ եկեղեցւոյ պահպանման եւ շէնացման գործին մէջ: Գրիգոր Պասմանճեան առ այսօր կը ծառայէ Հայ Առաքելական եկեղեցւոյ եւ մեծ գործեր կը կատարէ հայկական եկեղեցիներու պահպանման համար ինչպէս Սինկափուրի, այնպէս ալ Եանկոնի, Մեանմարի, Տհակայի մէջ:

«Սինկափուրի հայկական համայնքը եւ եկեղեցւոյ հոգաբարձուներու խորհուրդը հպարտ է եւ ուրախ, որ Գրիգոր Պասմանճեան նման բարձր պարգեւի արժանացաւ:  Մենք մեր շնորհակալութիւնը կը յայտնենք Ամենայն Հայոց Կաթողիկոս Գարեգին Բ-ին»,-«Հայերն այսօրի»ն հետ զրոյցին նշեց Սինկափուրի Սուրբ Գրիգոր Լուսաւորիչ եկեղեցւոյ հոգաբարձուներու խորհուրդի նախագահ Արմէն Պուտաղեան:

«Սուրբ Գրիգոր Լուսաւորիչ» պատուոյ բարձրագոյն շքանշանը հաստատուած է 1919 թուականին` Գէորգ Է Սուրէնեանց ամենայն հայոց Կաթողիկոսի օրհնութեամբ: Կը շնորհուի Ամենայն Հայոց կաթողիկոսի սրբատառ Կոնդակով` յանուն Հայաստանեայց Առաքելական Սուրբ եկեղեցւոյ եւ մայր Աթոռ Սուրբ էջմիածինի` ի նշանաւորումն մեծ բարերարութիւններու, որոնք կը մատուցուին հայոց եկեղեցւոյ, հայ ժողովուրդին եւ Հայաստան աշխարհին:

Շքանշանը կը պատրաստուի ոսկիէ  եւ կը զարդարուի փոքրիկ ադամանդներով (50×40մմ): Աջ եւ ձախ կողմերէն երիզուած է դափնիի եւ կաղնիի ճիւղերով, որոնց մէջ` վերին հատուածին մէջ, ամենայն Հայոց Կաթողիկոսի խորհրդանշանն է`  խոյրով, խաչ-գաւազանով, հովուական (եպիսկոպոսական) գաւազանով, կոնքեռով եւ եմիփորոնով (ծայրերուն կը գրուին ժամանակի Հայրապետի անուան սկզբնատառերը` «Գ» եւ «Բ», (Գարեգին Բ): Իսկ ներքին հատուածի կեդրոնական մասին մէջ Սուրբ էջմիածինի Մայր տաճարն է` Արարատ լերան համապատկերին` «Սուրբ էջմիածին» մակագրութեամբ: