Յունահռոմէկան ոճի ըմբշամարտի Հայաստանի ազգային հաւաքականի անդամ, միջազգային բազմաթիւ մրցաշարերու յաղթող ու մրցանակակիր, 66 քկ քաշային կարգի մէջ Հայաստանի ախոյեան Միհրան Յարութիւնեան անցնող շաբաթավերջին հրաշալի ելոյթ ունեցած է Դարգօ–Սալէ քաղաքին մէջ Ռուսաստանի Եամալօ-Նենեցեան ինքնավար մարզի նահանգապետի մրցանակներու միջազգային խաղարկութեան: Այս մասին կը հաղորդէ Tert.am-ը:

5-րդ անգամ կազմակերպուող այս ստուգատեսին մասնակցած են ոչ միայն Ռուսաստանի տարբեր մարզերու, այլեւ Ուքրանիոյ, Ղազախստանի, Ատրպէյճանի, Պելառուսիոյ, Սերպիոյ եւ Հայաստանի 100-է աւելի ըմբիշներ, որոնց մէջ մեծ մասը աշխարհի ու Եւրոպայի առաջնութեան մրցանակակիրներ ու միջազգային մրցաշարերու յաղթողներ են:

Այս պատասխանատու մրցաշարին՝ Հայաստանը ներկայացնող Միհրան Յարութիւթեան, որ, ի դէպ, հանդէս եկած է իրեն համար նոր` 71 քկ քաշային կարգի մէջ, գերազանց դրսեւորած է ինքզինք: Պարտութեան մատնելով իր բոլոր մրցակիցները՝ (եզրափակիչին Վիքթոր Սադրիգովը)` նուաճած է ոչ միայն այս քաշային կարգի գլխաւոր մրցանակը, այլեւ ցուցադրած իր բարձր վարպետութեան համար՝ ստուգատեսի կազմակերպիչներու կողմէ ճանչցուած է մրցաշարի լաւագոյն ըմբիշ ու պարգեւատրուած է յատուկ մրցանակով:

Նշենք, որ Յարութիւթեանէն բացի հիւրերէն ախոյեան դարձած է նաեւ 98 քկ քաշային կարգի մէջ հանդէս եկած Պելառուսիոյ պատուիրակ Ալեքսանդր Կրապովիգը:

Միւս 6 քաշային կարգերուն մէջ (59 քկ, 66 քկ, 75 քկ, 50 քկ, 85 քկ եւ 130 քկ) յաղթած են Ռուսաստանի ըմբիշները: