ՀՅԴ Եւրոպայի Հայ Դատի գրասենեակի նախաձեռնութեամբ, Եւրոպայի մէջ կը շարունակուին «Թեւանիկ» շարժանկարի ցուցադրութիւնները: Ցուցադրութիւններուն ներկայ են նաեւ շարժանկարի բեմադրիչ Ջիւան Աւետիսեան եւ Արցախի մշակոյթի եւ երիտասարդութեան  հարցերու փոխնախարար Լեռնիկ Յովհաննիսեան: Այս մասին  կը տեղեկացնէ  aparaj.am կայքը:

Լոնտոնի հայ համայնքի «Նաւասարդեան» կեդրոնին մէջ  կայացած ցուցադրութեան  յաջորդեցին Պելճիգայի Լիեժ եւ Մեխելէն քաղաքներու  հայ համայնքներուն համար ցուցադրութիւնները:  Իւրաքանչիւր ցուցադրութեան յաջորդեց հարց ու պատասխան բեմադրիչին եւ  փոխնախարարին հետ:

Ցուցադրութունները կը  շարունակուին նաեւ այսօր ` 28 Հոկտեմբերին, Պրիւքսէլի մէջ : Բացի շարժանկարի ցուցադրութենէն բեմադրիչ Ջիւան Աւետիսեան զանազան հանդիպումներ պիտի ունենայ Պելճիգա բնակող շարք մը արուեստագէտներու  հետ յառաջիկային համագործակցելու նպատակով:

Բեմադրիչի եւ փոխնախարարի ներկայութեամբ շարժանկարը պիտի ցուցադրուի նաեւ  Ամսդըրտամի, Ռիկայի եւ քանի մը այլ քաղաքաներու մէջ :

Իսկ եւրոպական ցուցադրութիւններէն ետք   Ջիւան Աւետիսեան պիտի մեկնի  Լիթուանիա`  մասնակցելու Վիլնիւսի մէջ կայանալիք  շարժանկարի փառատօնին:

Նախօրէին Չինաստանի Շաանսի նահանգի Սիան քաղաքին մէջ աւարտեց «Մետաքսի ճանապարհ» առաջին միջազգային կինոփառատօնը, ուր Ջիւան Աւետիսեանի «Թեւանիկ» ժապաւէնը արժանացաւ փառատօնի բարձրագոյն` «Հանդիսատեսի համակրանք» մրցանակին: