Սեպտեմբեր 29-ին պաշտօնական այցով Հայաստանի Հանրապետութիւն ժամանած Յունաստանի Նախագահ Քարոլոս    Փափուլիասը   ՀՀ ԱԳ  նախարար  Էդուարդ  Նալբանդեանի  եւ  Երեւանի  քաղաքապետ    Տարօն Մարգարեանի ուղեկցութեամբ այցելեց Ծիծեռնակաբերդ` Հայոց ցեղասպանութեան յուշահամալիր:

Յունաստանի Նախագահ Քարոլոս Փափուլիասը ծաղկեպսակ տեղադրեց Մեծ  Եղեռնի    զոհերու  յուշարձանին, այնուհետեւ     Յունաստանէն     ժամանած    պատուիրակութեան    անդամները      ծաղիկներ         տեղադրեցին ցեղասպանութեան զոհերու յիշատակը յաւերժացնող անմար կրակին մօտ եւ մէկ վայրկեան լռութեամբ յարգեցին անմեղ զոհերու յիշատակը:

Հայոց ցեղասպանութեան թանգարան – հիմնարկի  տնօրէն  Հայկ  Դեմոյեան   Յունաստանի  Նախագահ Քարոլոս Փափուլիասին   եւ   անոր   ուղեկցող    պատուիրակութեան  ներկայացուցիչներուն    պատմեց   Յուշահամալիրի կառուցման պատմութեան մասին:

Յունաստանի   Նախագահը   այցելեց   նաեւ   Յիշողութեան   պուրակը, ուր ջրեց 2007  թուականին` իր առաջին այցելութեան ժամանակ տնկած արծաթափայլ եղեւնին:

ՀՑԹԻ տնօրէն Հայկ Դեմոյեան Նախագահին յանձնեց «Ֆրիտեօֆ Նանսէն» ոսկէ մետալ:

Յիշեցնենք,   որ այս  տարուան Սեպտեմբեր  9-ին   Յունաստանի   խորհրդարանը   ընդունեց Ցեղասպանութեան ժխտումը քրէականացնող օրինագիծ, իսկ 1996 թուականի ապրիլ 25-ին Յունաստանի խորհրդարանը ճանչցած է Հայոց ցեղասպանութեան պատմական փաստը: