ՀՀ մարմնակրթութեան  եւ երիտասարդութեան հարցերու նախարար Գաբրիէլ Ղազարեան սեպտեմբեր 11-ին հիւրընկալած է «Հայաստան-Սփիւռք» 5-րդ համաժողովի ծիրէն ներս  Հայաստան գտնուող Նորա Եակուբեանը (ԱՄՆ) եւ Յովսէփ Տէրտէրեանը(Լիբանան):

Հիւրերը ներկայացուցած են նախարարի  մարմնակրթութեան ոլորտին մէջ համագործակցութեան առաջարկութիւն, որ կը վերաբերի ջրային մարզաձեւերուն` լող, ջրագնդակ, ջրացատկ: Յ. Տէրտէրեան տեղեկացուցած է, որ ինք, համագործակցելով արտերկրի  քանի մը կազմակերպութիւններու, հեղինակաւոր ուվաստակաշատ մարզիկներու եւ
մարզիչներու հետ, պատրաստ է միջնորդելու իր գործընկերներու փորձը հայ մարզիկներուն փոխանցելու գործընթացքը կազմակերպելու համար:

Գաբրիէլ Ղազարեան ողջունած է հիւրերը եւ իր գոհունակութիւնը յայտնած,
որ Սփիւռքի մէջ բնակող մեր հայրենակիցները պատրաստ են մասնակցութիւն ունենալու Հայաստանի տարբեր ոլորտներու զարգացման գործին մէջ: Ան հիւրերուն ներկայացուցած է ջրային մարզաձեւերուն մէջ հայ մարզիկներու ձեռքբերումները եւ նշած, որ կազմակերպչական եւ ֆինանսական  շարք մը հարցերու լուծման պարագային հնարաւոր պիտի ըլլայ հասնիլ աւելի լաւ մարզական յաջողութիւններու:

Նախարարը հանդիպման աւարտին շնորհակալութիւն յայտնած է Ն. Եակուբեանին եւ Յ. Տէրտէրեանին այցելութեան համար եւ վստահեցուցած, որ ձեւաւորուելիք համագործակցութեան արդիւնքներէն պիտի շահի միայն հայկական սպորտը, այս մասին կը տեղեկացնեն ՀՀ մարմնակրթութեան եւ երիտասարդութեան հարցերու նախարարութեան մամլոյ ծառայութենէն: