Յուլիս 29-ին ՀՀ սփիւռքի նախարար Հրանոյշ Յակոբեան հանդիպում ունեցաւ Պոլսոյ «Լուսաւորիչ Դպրաց դաս» երգչախումբին` գեղարուեստական ղեկավար Յակոբ Մամիկոնեանի եւ ատենապետ Յակոբ Սաֆարեանի ղեկավարութեամբ:

Նախարարը բարձր գնահատեց 85-ամեայ երգչախումբի գործունէութիւնը: «Դուք դարերով էք խօսում` մատուցելով հայկական երգը պոլսահայ համայնքին: Դուք ելոյթ էք ունեցել Պոլսի պատրիարքարանի 550-ամեակին նուիրուած հանդիսութեանը եւ այլ պատմական հանդիսութիւնների ժամանակ», – ընդգծեց նախարար Հ.Յակոբեան:

ՀՀ սփիւռքի նախարար Հրանոյշ Յակոբեան շնորհակալութիւն յայտնեց «Մարմարա» օրաթերթի փոխխմբագիր Մաքրուհի Յակոբեանին` երգչախումբի ելոյթը հայրենիքի մէջ կազմակերպելու գործուն աջակցութիւն ցուցաբերելուն համար:

Իրենց հերթին շնորհակալութիւն յայտնելով ՀՀ սփիւռքի նախարարութեան` «Իմ Հայաստան» համահայկական փառատօնը կազմակերպելուն եւ փառատօնի ծիրէն ներս պոլսահայ երգի եւ պարի համոյթներուն դրսեւորուելու բացառիկ հնարաւորութեան համար` Յակոբ Սաֆարեան նշեց, որ այս այցը երգչախումբի 36 անդամներէն շատերուն համար աննախադէպ հնարաւորութիւն է առաջին անգամ տեսնելու Հայաստանի տեսարժան վայրերը, ճանչնալու եւ ընկերանալու անկախ Հայաստանի մէջ բնակող իրենց հայրենակիցներուն հետ:

Հանդիպման աւարտին երգչախումբի անդամները իրենց հարցերը ուղղեցին ՀՀ սփիւռքի նախարարին: