Յուլիս 18-ին ՀՀ սփիւռքի նախարարութեան` Սփիւռքի երիտասարդներու հայրենաճանաչութեան «Արի տուն» ծրագիրի 4-րդ փուլի մասնակիցները հիւրընկալուեցան ՀՀ ներքին զօրքերու թիւ 1033 զօրամասին մէջ:

Արիտունցիներուն ողջունեց զօրամասի հրամանատար, գնդապետ Գուրգէն Գրիգորեան, ան փոխանցեց նաեւ ՀՀ ոստիկանութեան պետ Վլադիմիր Գասպարեանի խօսքը: Ձեռնարկին կը մասնակցէր ՀՀ սփիւռքի նախարարի տեղակալ Սերժ Սրապիոնեան: Ան շնորհակալութիւն յայտնեց ջերմ ընդունելութեան համար եւ նշեց, որ ՀՀ ոստիկանութեան բոլոր ծառայութիւնները մշտապէս կ’աջակցին Սփիւռքի նախարարութեան ծրագիրներու իրականացման:

Ծրագիրի մասնակիցները ծանօթացան զօրամասի առօրեաին, ականատես եղան զինավարժութիւններուն:

Սփիւռքահայ պատանիներն ու աղջիկները ծաղիկներ դրին Արցախեան ազատամարտին զոհուած հերոսներուն եւ զօրամասի զոհուած ծառայողներու յուշապատին մօտ: Անոնք մոմ վառեցին զօրամասի Սբ. Մարիամ Աստուածածին մատուռին մէջ:

Համերգային ծրագիրով հանդէս եկաւ ՀՀ վաստակաւոր արուեստագիտուհի Արուս Գուլանեան:

Այնուհետեւ  արիտունցիները ճաշեցին զինուորական ճաշարանին մէջ:

Նշենք, որ «Արի տուն»  ծրագիրի բոլոր փուլերու առաջին շաբթուան ուրբաթ օրը հայրենասիրական դաստիարակութեան օր է. մասնակիցները կ’այցելեն Եռաբլուր պանթէոն, ուր անոնց կը ծանօթացնեն Արցախեան ազատամարտի պատմութեան ու կը ներկայացնեն հերոսներուն:  Երեխաները ծաղիկներ կը դնեն զոհուած ազատամարտիկներու շիրմներուն,  եկեղեցւոյ մէջ  մոմ կը վառեն, կ’այցելեն Ծիծեռնակաբերդ` իրենց յարգանքի տուրքը մատուցելու Հայոց ցեղասպանութեան զոհերու յիշատակին` հնչեցնելով «Յիշում եմ եւ պահանջում» կարգախօսը:

 Այնուհետեւ անոնք կը հիւրընկալուին Հայաստանի զօրամասերէն մէկուն մէջ: