Նուէրներուն առթիւ պզտիկներուն հետ ուրախանալու եւ բարերաներուն իրենց երախտագիտութիւնը յայտնելու համար գիւղացիները եկած էին հրապարակ: Մէկ կողմէ պզտիկները խինդով եւ  հետաքրքրութեամբ պայուսակները կը բանային, միւս կողմէ՝ բարձր դասարանի աշակերտները  նուէրները առնելով տուն կ’աճապարէին:

Հաւաքուած գիւղացիները իրարու հետ կը խօսէին նուէրներուն եւ իրենց պզտիկներուն  ուրախութեան մասին: Իսկ դպրոցական աշակերտ ունեցող մայրերն ու հայրերը, գնահատելով տեղի  ունեցածը, կ’ուրախանային իրենց պզտիկներուն ուրախութեամբ: Հոն էր նաեւ չորս թոռնիկ ունեցող  Ռոզա մեծ-մայրիկը, որ անակնկալ նուէրներէն յուզուած, կ’ըսէր որ զիրենք ուրախացնելու համար  պզտիկ բան մըն ալ կը բաւէր, որովհետեւ կարեւորը ցոյց տրուած հոգատարութիւնն է, հային հայուն  հանդէպ սէրը, իրարու զօրավիգ եւ նեցուկ ըլլալը:

Նուէրները բաժնելու համար Լոնտոնէն եկած Անահիտ Ղազարեանը ներկաներուն  խոստացաւ որ դէմքերուն վրայ իր տեսած գոհունակութեան արտայայտութիւնը եւ պզտիկներուն  ուրախութիւնը պիտի հաղորդէ Բրիտանիոյ հայկական համայնքի ներկայացուցիչներուն:

Անցած 11 տարիներու ընթացքին Շիրակի, Լորիի, Տաւուշի, Արագածոտնի, Վայոց Ձորի եւ Սիւնիքի  մարզերու մօտաւորապէս 2200 աշակերտ այս ծրագիրին ծիրէն ներս ստացած են օգնութիւն:

Ծրագիրի պատասխանատու՝ Մարիամ Զէնճիրճեան