Շաբաթ, 28 Յունիս 2014-ի երեկոյեան, ի պատիւ Գանատահայոց թեմի նորընտիր առաջնորդ՝ Հոգեշնորհ Տ. Աբգար Վրդ. Յովակիմեանի, Լավալ քաղաքի մէջ տեղի ունեցաւ Սասնայ Երկիր ժողովրդական երգի-պարի երեկոյ՝ մասնակցութեամբ Թորոնթոյի Ս. Երրորդութիւն եկեղեցւոյ Սասուն պարախումբին, ընդհանուր գեղարուեստական ղեկավար՝ Ճո Աւագեան։ Սասնայ աւանդական եւ հայկական երգերով ելոյթ ունեցաւ Հայաստանէն ժամանած հանրայայտ երգիչ Ռուբէն Սասունցին։ Հարիւրաւոր հայորդիներ, հոգեւորականներ եւ կազմակերպութեանց ներկայացուցիչներ մասնակցեցան ի պատիւ նորընտիր առաջնորդին նուիրուած այս համերգին։ Յիշեալ ձեռնարկը կազմակերպած էր Մոնթրէալի Ս. Գրիգոր Լուսաւորիչ եւ Լավալի Ս. Խաչ եկեղեցիներու ծխական խորհուրդը։

Կիրակի 29 Յունիս 2014-ին, Գանատահայոց թեմի նորընտիր առաջնորդ հոգեշնորհ Տ. Աբգար Վրդ Յովակիմեանն իր Անդրանիկ Ս. Պատարագը մատուցեց Մոնթրէալի Առաջնորդանիստ Ս. Գրիգոր Լուսաւորիչ եկեղեցւոյ մէջ հանդիսապետութեամբ գերշ. Տ. Նաթան Արքեպս. Յովհաննիսեանի, ներկայութեամբ բազմաթիւ հաւատացեալ ժողովուրդի, Գանատայի մէջ Հայաստանի Հանրապետութեան արտակարգ եւ լիազօր դեսպան տիար Արմեն Եգանյանն ու ազնուափայլ տիկ Մարիա Եգանյանը, Թեմական խորհուրդի եւ Առաջնորդարանի յարակից մարմիններու անդամներու, Թորոնթօյի, Մոնթրէալի եւ Լավալի ծուխերու հոգեւորականներու, ինչպէս նաեւ Մոնթրէալի եւ Լավալի հայկական կազմակերպութեանց եւ միութեանց ներկայացուցիչներու։ Ս. Պատարագի ընթացքին տեղի ունեցաւ Առաջնորդական գաւազանի փոխանցում, որմէ ետք օրուան պատգամն ու քարոզը փոխանցեց նորընտիր առաջնորդ Հայր Սուրբը։

Յաւարտ Ս. Պատարագի եկեղեցւոյ “Մարի Մանուկեան” սրահին մէջ տեղի ունեցաւ ժողովրդային ընդունելութիւն ի բարի գալուստ առաջնորդ Հայր Սուրբին, եւ ի շնորհակալութիւն եւ հրաժեշտ գեր. Տ. Նաթան Արքեպս. Յովհաննիսեանի։ Հայր Սուրբին բարեգալստեան խօսքով եւ կենսագրական տուեալներով հանդէս եկաւ տիկ. Լիզա Սվաճեան որմէ ետք իրենց բարեգալստեան եւ շնորհակալութեան խօսքեր ուղղեցին Գանատայի մէջ Հայաստանի Հանրապետութեան դեսպանը, Ս. Գրիգոր Լուսաւորիչ եկեղեցւոյ հոգեւոր հովիւ՝ Արժ. Տ. Վազգէն քհնյ. Պոյաճեան, Թորոնթօյի Ս. Երրորդութիւն եկեղեցւոյ հոգեւոր հովիւ Արժ. Տ. Զարեհ Ա. Քհնյ. Զարգարեան։ Ի շնորհակալութիւն գերաշնոր Տ. Նաթան Արքեպս. Յովհաննիսեանի մէկամեայ Առաջնորդական տեղապահի պաշտօնի ծառայութեան եպիսկոպոսական մատանի նուիրուեցաւ, որմէ ետք Սրբազան հայրն իր խրատն ու բարեմաղթանքները ուղղեց ներկաներուն եւ յաջողութիւններ մաղթեց Առաջնորդ հայր Սուրբին իր ծառայութեան մէջ։ Նաթան Սրբազանը յառաջիկայ օրերին կը վերադառնայ Մայր Աթոռ Ս. Էջմիածին։

Տ. Միւռոն Քհնյ. Սարգիսեան