ՀՀ մշակոյթի նախարարութեան եւ Հայաստանի պետական ֆիլհարմոնիկ նուագախումբի նախաձեռնութեամբ` ս. թ. յունիս 15-ին, ժամը 19:00-ին «Արամ Խաչատրեան» համերգասրահին մէջ`  Հայաստանի պետական ֆիլհարմոնիկ նուագախումբին հետ (խմբավար Էդուարդ Թօփչեան) հանդէս պիտի գան անուանի ջութակահար Սերգէյ Խաչատրեանը եւ թաւջութակահար Նարեկ Հախնազարեանը:

Ծրագիրին պիտի հնչեն Պրամսի ջութակի, թաւջութակի եւ նուագախումբի համար կրկնակի համերգը, ինչպէս նաեւ Պրամսի N 2 սիմֆոնիան:

Ս. թ. յունիս 13-ին, ժամը 15:00-ին, «Կոլտըն Թուլիփ» հիւրանոցի «Վիւալդի» սրահին մէջ Հայաստանի պետական ֆիլհարմոնիկ նուագախումբի եւ աշխարհահռչակ երաժիշտներ Սերգէյ Խաչատրեանի (ջութակ) եւ Նարեկ Հախնազարեանի (թաւջութակ) համատեղ համերգին նուիրուած մամուլի ասուլիսին կը մասնակցէին ՀՀ մշակոյթի նախարարութեան աշխատակազմի ժամանակակից արուեստի վարչութեան պետ Սէյրանուհի Գեղամեան, Սերգէյ Խաչատրեան, Նարեկ Հախնազարեան, Էդուարդ Թօփչեան: Այս մասին կը տեղեկանանք ՀՀ մշակոյթի նախարարութեան պաշտօնական կայքէն: