Հայաստանի փոխվարչապետ, տարածքային կառավարման նախարար Արմէն Գէորգեան  Գեղարքունիքի մարզպետ Ռաֆիկ Գրիգորեանի եւ Գաւառի քաղաքապետ Գուրգէն Մարտիրոսեանի  ուղեկցութեամբ մայիս 26-ի երեկոյեան այցելած է Գաւառի Հացառատ թաղամաս:

Փոխվարչապետը հանդիպած է բնակիչներուն, լսած անոնց մտահոգող խնդիրները: Յիշեցնենք, որ մայիս 15-ին Ա. Գէորգեան ընդունած էր հացառատցիներուն եւ խոստացած, որ յառաջիկային  կ’այցելէ եւ տեղուոյն վրայ կը ծանօթանայ խնդիրին:

Մինչեւ բնակիչներուն հետ հանդիպումը, փոխվարչապետը այցելած է թաղամասին մէջ գտնուող`  Արցախեան ազատամարտին զոհուածներու յիշատակը յաւերժացնող յուշահամալիր եւ յարգանքի տուրք մատուցած:

Փոխվարչապետին հետ հանդիպման բնակիչները  հիմնականին մէջ դժգոհած են  Գաւառի քաղաքային իշխանութիւններու կողմէ  թաղամասի նկատմամբ անուշադրութենէն եւ  առաջարկած են թաղամասին ինքնուրոյն համայնքի կարգավիճակ տալ: Անոնք մասնաւորապէս նշած են, թէ թաղամասի  բնակիչներու կողմէ տեղական պիւտճէ փոխանցուող հարկային միջոցներն  ու համայնքի պիւտճէէն թաղամասին համար  յատկացուող գումարները անհամաչափ են: Բնակիչները  դժգոհած են  նաեւ թաղամասին մէջ ճանապարհներու, մանկապարտէզի անմխիթար վիճակէն:

Փոխվարչապետը բնակիչներու ուղեկցութեամբ  շրջայց  կատարած է թաղամասին մէջ, այցելած մանկապարտէզ, ծանօթացած շէնքային պայմաններուն: Արձանագրուած է, որ ոչ բարուոք վիճակի մէջ գտնուող շէնքը համալիր վերանորոգման կարիք ունի:

Պայմանաւորուածութիւն ձեռք բերուած է, որ բնակիչներու, ինչպէս նաեւ Տարածքային կառավարման նախարարութեան եւ մարզպետարանի ներկայացուցիչներէն կը ստեղծուի աշխատանքային խումբ, որ  կ’արձանագրէ բոլոր խնդիրները եւ կը փորձէ  լուծումներ առաջարկել:

Փոխվարչապետը խոստացաւ նաեւ, որ յառաջիկային համապատասխան մասնագէտներ պիտի գործուղուին Գաւառ`  համայնքի պիւտճետային գործընթացները տեղուոյ վրայ ուսումնասիրելու համար:

NEWS.am