ԲԵԼԳԻԱՅԻ ԹԱԳԱՒՈՐՈՒԹԻՒՆՈՒՄ

ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ

ԱՐՏԱԿԱՐԳ ԵՒ ԼԻԱԶՕՐ ԴԵՍՊԱՆ

Ն.Գ. ՊԱՐՈՆ ԱՒԵՏ ԱԴՈՆՑԻՆ

Յարգելի´ պարոն դեսպան,

Սիրով ողջունում ենք Ձեզ եւ յայտնում մեր խորին երախտագիտութիւնը` «Հայոց ցեղասպանութեան 100-րդ տարելիցին նուիրուած միջոցառումները համակարգող` Եւրոպայում գործող տարածաշրջանային յանձնախմբերի ղեկավարների եւ ներկայացուցիչների» հաւաք-հանդիպման կազմակերպմանն ու անցկացմանը լաւագոյնս աջակցելու համար:

Ոգեւորիչ փաստ է, որ Հայկական սփիւռքը, մէկ դար եւ աւելի իր մէջ պահելով անցեալի դառը յիշողութիւնն ու  վէրքը, բայց միեւնոյն ժամանակ պայքարելու ու մաքառելու անկոտրում կամքն ու ոգին, համախմբուել է յանուն արդարութեան վերականգնման, եւ այսօր Հայոց պետականութեան հովանու ներքոյ նախանշում են Հայոց ցեղասպանութեան 100-րդ տարելիցը ոգեկոչող միասնական ծրագրեր: Ուստի առաւել կարեւորւում է պետութեան ներկայացուցիչների աջակցութիւնն ու սատարումը հայ համայնքներին:  Հայոց դեսպանատները դարձել են մեր համայնքների յենարանն ու պաշտպանը:

Յարգարժա´ն դեսպան,

Անկեղծօրէն շնորհակալ եմ Ձեզ եւ դեսպանութեան ողջ անձնակազմին հայ համայնքի հետ արդիւնաւէտ աշխատանքի, Սփիւռքի նախարարութեան հետ սերտ համագործակցութեան եւ յատկապէս Եւրոպական  հաւաք-հանդիպման անցկացման գործում Ձեր ունեցած կարեւորագոյն ներդրման համար: Յատկանշական էր այն հանգամանքը, որ յատկապէս «Հայ տան» մէջ կազմակերպուած ազգային-պետական հաւաքի բոլոր մասնակիցներն էլ մեկնեցին ոգեւորուած, զինուած նոր փորձով եւ պատրաստակամ նոր ծրագրեր իրականացնելու համար:

Մաղթում ենք Ձեզ անսպառ եռանդ` Հայաստանի Հանրապետութեան զօրացմանն ու համազգային հիմնախնդիրների լուծմանն ուղղուած Ձեր գործունէութեան ընթացքում:

Յարգանքով`

ՀՀ ՍՓԻՒՌՔԻ ՆԱԽԱՐԱՐԻ ՊԱՇՏՕՆԱԿԱՏԱՐ

ՀՐԱՆՈՅՇ ՅԱԿՈԲԵԱՆ